ભારતીય અંડર-19 મહિલા ટીમની ડાબોડી સ્પિનર વૈષ્ણવી શર્માએ મંગળવારે મલેશિયા સામે હેટ્રિક લઈને ઇતિહાસ રચ્યો. ICC અંડર-19 મહિલા T20 વર્લ્ડ કપ 2025 ની 16મી મેચમાં, વૈષ્ણવી શર્માએ ઇનિંગની 14મી ઓવરમાં પોતાની હેટ્રિક પૂર્ણ કરી. વૈષ્ણવી અંડર-૧૯ મહિલા ટી20 વર્લ્ડ કપમાં હેટ્રિક લેનારી પ્રથમ ભારતીય ખેલાડી બની. વૈષ્ણવીએ ઇનિંગ્સની 14મી ઓવરના બીજા બોલ પર નૂર એન બિન્તી રોસલાન (3) ને LBW આઉટ કરી. બીજા બોલ પર શર્માએ નૂર ઇસ્મા દાનિયા બિન્ટી મોહમ્મદ ડેનિયલને LBW આઉટ કરી. ત્યારબાદ ઓવરના ચોથા બોલ પર વૈષ્ણવીએ સિટી નજવાહને ક્લીન બોલ કરીને પોતાની હેટ્રિક પૂર્ણ કરી અને ઇતિહાસ રચ્યો.
𝕎 𝕎 𝕎#TeamIndia‘s left arm spinner & debutant Vaishnavi Sharma becomes the first Indian bowler to pick up a hattrick in #U19WomensWorldCup tournament! 🙌🏻#U19WomensT20WConJioStar 👉 #INDWvMASW, LIVE NOW on Disney+ Hotstar! pic.twitter.com/DaEdFnus07
— Star Sports (@StarSportsIndia) January 21, 2025
વૈષ્ણવીની ઘાતક બોલિંગ
તમને જણાવી દઈએ કે વૈષ્ણવીએ મેચમાં ઘાતક બોલિંગ કરી હતી અને 4 ઓવરના ક્વોટામાં 1 મેડન સહિત 5 રન આપીને 5 વિકેટ લીધી હતી. હેટ્રિક લેવા ઉપરાંત, તેણે મલેશિયાના કેપ્ટન નૂર દાનિયા સૈયદાહ (1) અને નુરીમાન હિદાયાને પણ આઉટ કર્યા. વૈષ્ણવી ઉપરાંત આયુષી શુક્લાએ શાનદાર બોલિંગ કરી અને 3.3 ઓવરમાં 8 રન આપીને 3 વિકેટ લીધી જેમાં 1 મેડનનો સમાવેશ થાય છે.
મલેશિયા 31 રનમાં આઉટ
ભારતીય બોલરોની ઘાતક બોલિંગ સામે યજમાન ટીમના બેટ્સમેનોએ શરણાગતિ સ્વીકારી લીધી. મલેશિયાની કોઈ મહિલા બેટ્સમેન બે આંકડાનો સ્કોર કરી શકી નહીં. કુઆલાલંપુરમાં રમાયેલી મેચમાં, પ્રથમ બેટિંગનું આમંત્રણ સ્વીકારનાર મલેશિયન ટીમ 14.3 ઓવરમાં ૩૧ રનમાં ઓલઆઉટ થઈ ગઈ હતી.
32 રનના સરળ લક્ષ્યનો પીછો કરતા ભારતે કોઈ પણ વિકેટ ગુમાવ્યા વિના માત્ર 17 બોલમાં લક્ષ્ય હાંસલ કરી લીધું. ભારત તરફથી ગોંગડી ત્રિશાએ માત્ર 12 બોલમાં 5 ચોગ્ગાની મદદથી અણનમ 27 રન બનાવ્યા. જ્યારે જી. કમાલિની 5 બોલમાં 1 ચોગ્ગાની મદદથી ચાર રન બનાવીને અણનમ રહી. ભારતે 103 બોલ બાકી રહેતા 10 વિકેટે મેચ જીતી લીધી. ભારત માટે શાનદાર પ્રદર્શન કરનાર વૈષ્ણવી શર્માને પ્લેયર ઓફ ધ મેચ તરીકે પસંદ કરવામાં આવી. આ જીત સાથે, ભારત સતત બે જીત સાથે ગ્રુપ A માં ટોચ પર છે. ભારતે તેની પહેલી મેચમાં વેસ્ટ ઈન્ડિઝને હરાવ્યું હતું.
