વર્લ્ડ ટેસ્ટ ચેમ્પિયનશિપ 2025-27 ચક્રની એક અત્યંત મહત્વપૂર્ણ મેચમાં શુભમન ગિલની આગેવાની હેઠળની ભારતીય ટીમે શ્રીલંકાને 165 રનથી હરાવીને ભવ્ય જીત નોંધાવી છે. આ જીતથી ભારતના પોઈન્ટ્સ અને ટકાવારી (PCT) માં મોટો ઉછાળો આવ્યો છે, જોકે રેન્કિંગ પોઝિશનમાં કોઈ ફેરફાર થયો નથી. હાર છતાં શ્રીલંકાની ટીમ પણ તેના અગાઉના છઠ્ઠા સ્થાને જ યથાવત છે.
આ મેચમાં ભારતે ટોસ જીતીને પ્રથમ બેટિંગ કરવાનો નિર્ણય લીધો હતો. સ્પીનરોને મદદરૂપ પીચ પર દેવદત્ત પડિક્કલે શાનદાર 167 રનની ઇનિંગ રમી હતી. આ સિવાય કે.એલ. રાહુલે 82 રન અને ધ્રુવ જુરેલે મહત્વપૂર્ણ 51 રન બનાવ્યા હતા, જેના આધારે ભારતે પ્રથમ ઇનિંગમાં 462 રનનો વિશાળ સ્કોર બનાવ્યો હતો. જવાબમાં શ્રીલંકાની પ્રથમ ઇનિંગ 284 રનમાં સિમિત રહી હતી. બીજી ઇનિંગમાં ભારતે 193 રન બનાવીને શ્રીલંકા સામે જીતવા માટે 372 રનનો ટાર્ગેટ મૂક્યો હતો. ટાર્ગેટનો પીછો કરવા ઉતરેલી શ્રીલંકન ટીમ બીજી ઇનિંગમાં માત્ર 206 રન બનાવીને ઓલઆઉટ થઈ ગઈ હતી અને ભારતે 165 રનથી મેચ પોતાના નામે કરી લીધી હતી.
ભારતના PCT માં વધારો, પણ સ્થાન 5મું જ રહ્યું
WTC 2025-27 ચક્રમાં ભારતે અત્યાર સુધી 10 મેચ રમી છે, જેમાં આ તેની 5મી જીત હતી. ટેસ્ટ જીતવા બદલ મળતા 12 અંક સાથે ભારતના કુલ અંક 52 થી વધીને 64 થઈ ગયા છે. ભારતની વિનિંગ ટકાવારી (PCT) 48.15 થી વધીને 53.33 થઈ છે (5.18 નો વધારો). આમ છતાં, ટીમ ઈન્ડિયા પોઈન્ટ્સ ટેબલમાં 5મા સ્થાને જ છે.
અન્ય ટીમોનું પોઈન્ટ્સ ટેબલમાં સ્થાન
ઓસ્ટ્રેલિયા: 9 માંથી 7 ટેસ્ટ જીતીને 77.78 PCT સાથે પ્રથમ સ્થાને છે.
દક્ષિણ આફ્રિકા: 75.00 PCT સાથે બીજા સ્થાને છે.
ન્યૂઝીલેન્ડ: 72.22 PCT સાથે ત્રીજા સ્થાને છે.
બાંગ્લાદેશ: ઓસ્ટ્રેલિયા સામે પ્રથમ ટેસ્ટમાં મેળવેલી ઐતિહાસિક જીત બાદ 66.67 PCT સાથે ચોથા સ્થાને પહોંચી ગયું છે.
ભારત: 53.33 PCT સાથે પાંચમા સ્થાને છે.
શ્રીલંકા: આ હાર બાદ તેમનો PCT 41.67 થી ઘટીને 33.33 થઈ ગયો છે, પરંતુ 20 અંક સાથે ટીમ છઠ્ઠા સ્થાને જાળવી રાખી છે.
