ગાંધીનગરઃ રાજ્ય વિધાનસભામાં મંગળવારે BBCની સામે પ્રસ્તાવ રજૂ કરવામાં આવ્યો છે. એમાં ભાજપના વિધાનસભ્ય વિપુલ પટેલે ગુજરાતનાં રમખાણોની સાથે છેડછાડનો આરોપ લગાવ્યો છે. હવે શુક્રવારે BBC ડોક્યુમેન્ટરી સામે પ્રસ્તાવ પર ચર્ચા થશે. પટેલે BBC ડોક્યુમેન્ટરીને મનઘડંત બતાવતાં કડક કાર્યવાહી કરવાની માગ કરી છે. તેમણે BBC પર 2002ના ગોધરાનાં તોફાનોને લઈને તત્કાલીન રાજ્ય સરકારને દોષ દેવાના પ્રયાસ કરવાનો પણ આરોપ લગાવ્યો છે. પ્રસ્તાવ અનુસાર BBC ડોક્યુમેન્ટરી ભારતની વૈશ્વિક છબિને ખરાબ કરવાનો હલકો પ્રયાસ છે.
વિધાનસભા સચિવાલય દ્વારા મંગળવારે મૂકવામાં આવેલા પ્રસ્તાવ અનુસાર ભારત એક લોકતાંત્રિક દેશ છે અને અભિવ્યક્તિની સ્વતંત્રતા એના બંધારણના મૂળમાં છે, પણ એનો અર્થ એ નથી કે એક મિડિયા સંસ્થાન દ્વારા એવી સ્વતંત્રતાનો દુરુપયોગ કરી શકે છે. બ્રિટિશ બ્રોડકાસ્ટિંગ કોર્પોરેશન (BBC)ની ડોક્યુમેન્ટરી ઇન્ડિયાઃ ધ મોદી ક્વેશ્ચન- બે ભાગમાં છે, જેમાં દાવો કરવામાં આવ્યો છે કે એ 2002નાં ગુજરાતનાં રમખાણોથી સંબંધિત કેટલાક પાસાઓની તપાસ પર આધારિત છે. ગુજરાતનાં રમખાણોના સમયે વડા પ્રધાન નરેન્દ્ર મોદી રાજ્યના મુખ્ય પ્રધાન હતા.
વિધાનસભામાં ધુળેટી મહોત્સવ
બીજી બાજુ, આજે રાજ્યના ઇતિહાસમાં પહેલી વાર વિધાનસભામાં ધુળેટી મહોત્સવ ઊજવાયો છે. વિધાનસભાના પ્રવેશદ્વાર પાસે ખાસ શમિયાણો ઊભો કરવામાં આવ્યો હતો. જ્યાં ધારાસભ્યો ઘુળેટીની મજા માણી રહ્યા છે. આ હોળી પર્વની ઉજવણીમાં રાજ્યના મુખ્ય મંત્રી, મંત્રીમંડળના સભ્યો તેમ જ ધારાસભ્યો જોડાયા હતા. કુદરતી રંગથી હોળીનો તહેવાર ઊજવવાનો સંદેશ રાજ્યની જનતાને આપવા માટે ખાસ કેસૂડાંના ફૂલોની વ્યવસ્થા પણ કરવામાં આવી હતી. આ સાથે વિવિધ રંગોની સાથે આ પર્વની ભવ્ય ઉજવણી કરવામાં આવી હતી.
