વડોદરા શહેરમાં 24 કલાકમાં એક બાદ એક ત્રણ અકસ્માતની ઘટના સામે આવી છે. જેમાં ગેંડા સર્કલ વિસ્તારમાં ગત રાત્રે ડિવાઇડર કુદાવીને જીપકાર સામેની તરફ ઊભેલી ઇકો કાર સાથે જઇને અથડાઈ હતી, એને પગલે લોકોનાં ટોળાં એકત્ર થઇ ગયાં હતાં. ઘટના સમયે સ્થળ પર હાજર લોકોએ અકસ્માત સર્જનાર જીપનો ચાલક નશામાં હોવાની આશંકા વ્યક્ત કરી હતી.
આજે બપોરે (4 ડિસેમ્બર) સમા સર્કલ પાસે કારચાલકે ટ્રાફિક જવાનને કચડવાનો પ્રયાસ કર્યો હતો. પૂરપાટ ઝડપે આવતા કારચાલકને રોકવાનો પ્રયાસ કરતાં કારચાલક ટ્રાફિક જવાનને ટક્કર મારીને ફરાર થઈ ગયો હતો. આ અંગે જાણવા મળ્યું કે સિગ્નલ તોડીને કારચાલક આવતો હતો, જેને રોકવાનો ટ્રાફિક-પોલીસ જવાને પ્રયાસ કર્યો હતો, પરંતુ કારચાલક રોકાવાને બદલે ટ્રાફિક-પોલીસ જવાનને ટક્કર મારી ફરાર થઈ ગયો હતો. આ મામલે સમા પોલીસ સ્ટેશનમાં કારચાલક સામે ગુનો નોંધવાની તજવીજ શરૂ કરી છે તેમજ ઉચ્ચ પોલીસ અધિકારીઓ ઘટનાસ્થળે દોડી ગયા હતા. ત્યાર બાદ અકસ્માત કરનાર જીપચાલક ત્યાં જ વાહન છોડીને જતો રહ્યો હતો. બાદમાં અકસ્માતનો ભોગ બનનારે અકસ્માત સર્જનાર વિરુદ્ધમાં ગોરવા પોલીસ મથકમાં ફરિયાદ નોંધાવી છે. એ બાદ પોલીસે વધુ કાર્યવાહી હાથ ધરી છે. પ્રાપ્ત માહિતી પ્રમાણે યુવાન અકસ્માત બાદ ભેગી થયેલી ભીડને સ્ટ્રેચરમાંથી ઊભો થઇને કહે છે કે મરી તો નથી ગયો ને..!. જેને પગલે લોકો વધુ રોષે ભરાયા અને બેજવાબદાર ચાલકને ભાન કરાવવા માટે ઉગ્ર સ્વરે પ્રત્યુત્તર આપે છે.
અત્રે ઉલ્લેખનીય છે કે આજે ગુજરાતમાં ચાર અલગ અલગ અકસ્માતોની ઘટના સામે આવી છે, જેમાં કુલ સાત લોકોનાં મોત થયાં છે. જ્યારે 15થી વધુ લોકો ઇજાગ્રસ્ત થયા છે. નડિયાદ નજીક અમદાવાદ-વડોદરા એક્સપ્રેસ હાઈવે પર પૂરપાટ જતી કારનું ટાયર ફાટી જતાં તે ટ્રક સાથે ભટકાતા ત્રણ લોકોના મોત થયા છે. અકસ્માતના પગલે એક્સપ્રેસ હાઇવે પર અંદાજીત 15 કિલોમીટર જેટલો ટ્રાફિકજામ થયો હતો. અકસ્માતની બીજી ઘટના દાહોદમાંથી સામે આવી છે. તોયણી ગામે મોડી રાતે બે બાઈક વચ્ચે ધડાકાભેર ટક્કર થતા સર્જાયેલા અકસ્માતમા 3 યુવકોના મોત થયા છે. ત્રીજો અકસ્માત બગોદરા-વટામણ હાઇવે પર થયો છે. તારાપુર ચોકડી નજીક ખાનગી કંપનીની લકઝરી બસ અને ટ્રક ભટકાયા છે. અકસ્માતની ચોથી ઘટના સુરતથી સામે આવી છે, જેમાં એક વ્યક્તિનું મોત થયું છે.
