અમદાવાદ: દિવાળીને આડે થોડા દિવસો જ બાકી છે. ત્યારે ડ્રાયફ્રૂટમાં દિવાળીની કોર્પોરેટ્સની ઘરાકી પૂરી થવા આવી છે. જ્યારે રિટેઈલ ઘરાકી હજી જોર પકડતી નથી. ત્યારે બીજી બાજુ આ વર્ષે કાજુના ભાવ ખાસ્સા ઊંચા છે. કિલોએ રૂ.200 જેટલા ઊંચા બોલી રહ્યા છે. કાજુના ભાવ રૂ.1000થી 1400ની રેન્જમાં છે. જ્યારે બદામના ભાવ રૂ. 800થી 1000ની આસપાસના બોલાઈ રહ્યા છે. ઉલ્લેખનીય છે કે અફઘાનિસ્તાનની કિસમિસ થોડી મોંઘી થઈ છે. તો પિસ્તાના ભાવ રૂ.1200થી 1400ની રેન્જમાં અથડાઈ રહ્યા છે. જરદાળુના સારી ક્વોલિટીના ભાવ રૂ. 900ની આસપાસના બોલાઈ રહ્યા છે. સારી ક્વોલિટીના અંજીરના કિલોદીઠ રૂ. 1600ની આસપાસ બોલાઈ રહ્યા છે.
આપને જણાવી દઈએ કે દિવાળીમાં તેરસ પહેલા વધુ ઘરાકી જોવા મળતી હોય છે. પરંતુ આ વર્ષે તે ઘરાકીમાં નોંધપાત્ર ઘટાડો જોવા મળી રહ્યો છે. તે જોતાં આ વખતે ધંધો ઓછો થવાની સંભાવના છે. પરંતુ હજી સુધી આશા પ્રમાણે બજારમાં લેવાલી જોવા મળતી ન હોવાનું વેપારીઓનું કહેવું છે. હવે ડ્રાયફ્રૂટના બોક્સમાં ચોકલેટ્સનો ખાસ્સો ઉમેરો થઈ રહ્યો છે. નોંધનીય બાબત છે કે ઇરાન-ઇઝરાયલ વચ્ચેના યુદ્ધને કારણે માલ આવવામાં તકલીફ પડી રહી હોવાથી આયાતી માલના ભાવ ઊંચા બોલાઈ રહ્યા છે. આફ્રિકાના દેશમાંથી માલ મોડો આવતો હોવાથી અને યુદ્ધને કારણે તેના ભાવ ઊંચકાયા છે. ડૉલરના ભાવમાં થતી વધઘટને પરિણામે પણ ભાવમાં ઊછાળો આવી જાય છે. કાજુનું લોકલ ઉત્પાદન તો ભારતના કુલ વપરાશના 25 ટકા જ છે. આફ્રિકાના અલગ અલગ દેશોમાંથી રૉ નટ્સની આયાત થાય છે. હોલસેલમાં આખા કાજુના ભાવ રૂ. 850થી 1600 સુધીના ભાવ છે. બેસ્ટ ક્વોલિટી કાજુના રિટેઈલમાં રૂા.1800ની આસપાસના ભાવ બોલાઈ રહ્યા છે. એપ્રિલ-મે 2024માં કાજુના ભાવ બોટમ પર હતા. ત્યાર બાદ તેના ભાવ ઊંચકાયા છે. ભારતમાં કાચા કાજુ મહારાષ્ટ્રના કોકણ બેલ્ટમાં, ગોવામાં, કર્ણાટકમાં, કેરળમાં તામિલનાડુમાં થાય છે. ગુજરાતમાં કાજુનું ઉત્પાદન અન્ય વિસ્તારોની તુલનાએ મામૂલી છે. હવે પછી તાન્ઝાનિયાની કાચા કાજુની સીઝન ચાલુ થઈ રહી છે. તેની સીઝનના કાજુ ભારત આવવા માંડશે. છતાં ભાવ નીચા જવાની શક્યતા ઓછી છે.
