મુંબઈઃ તાપસી પન્નૂ બોલીવુડની પ્રતિભાશાળી અભિનેત્રી છે, પરંતુ તેની એક હરકતે ઈન્ટરનેટ યૂઝર્સને ગુસ્સે કરી દીધાં છે. એક ફેશન શોમાં તાપસીએ લાલ રંગનાં બોલ્ડ ડ્રેસની સાથે ગળામાં પહેરેલાં એક હારને કારણે ઘણાં લોકો એની પર ભડકી ગયાં છે. તે હારમાં હિન્દૂધર્મીઓનાં આસ્થાસમા માતા લક્ષ્મીજીનું ચિત્ર પણ હતું.
ફોટોશૂટ અને ફેશન શો વખતની પોતાની આ તસવીરો અને વિડિયો ખુદ તાપસીએ જ પોતાનાં ઈન્સ્ટાગ્રામ એકાઉન્ટ પર પોસ્ટ કર્યાં છે. કાર્યક્રમ હતો રિલાયન્સ જ્વેલ્સ અક્ષય તૃતિયા કલેક્શન. એમાં તાપસીએ લાલ રંગનો ઉત્તેજક, ડીપ પ્લન્જિંગ નેકલાઈનવાળો ગાઉન પહેર્યો હતો. લોકોને વાંધો આ ડ્રેસ સામે નહીં, પરંતુ એની સાથે તાપસીએ એનાં ગળામાં પહેરેલા એક નેક્લેસ સામે છે, જેમાં માતા લક્ષ્મીજીની એક આકૃતિ હતી.
અનેક નેટયૂઝર્સે તાપસીને વખોડી કાઢતી કમેન્ટ્સ લખી છે. એક જણે લખ્યું છે કે તાપસીએ એનાં રીવીલિંગ ડ્રેસની સાથે લક્ષ્મીમાતાની આ આકૃતિ પહેરવી જોઈતી નહોતી.
એક અન્ય જણે લખ્યું છે, તાપસી તને શરમ આવવી જોઈએ. અત્યંત ઘૃણાસ્પદ. કોઈ પણ ધર્મના પ્રતિકને કેવી રીતે પ્રસ્તુત કરવું જોઈએ એની તને એક સેલિબ્રિટી હોવાને નાતે ખબર હોવી જોઈએ.
એક અન્ય જણે લખ્યું છેઃ આવા અશ્લિલ ફોટોમાં માતા લક્ષ્મીજીનો હાર પહેર્યો છે…. તાપસી તને શરમ આવવી જોઈએ.
