મુંબઈ: મેગાસ્ટાર ચિરંજીવી હવે ગિનિસ વર્લ્ડ રેકોર્ડના ધારક બની ગયા છે. 22 સપ્ટેમ્બરના રોજ અભિનેતાને 45 વર્ષમાં તેની 156 ફિલ્મોના 537 ગીતોમાં 24000 ડાન્સ મૂવ્સ કરવા માટે ખાસ રીતે સન્માનિત કરવામાં આવ્યાં છે. ભારતીય સિનેમાના ઈતિહાસમાં આ તારીખ સુવર્ણ અક્ષરે લખવામાં આવશે. 22 સપ્ટેમ્બર એટલા માટે પણ મહત્વપૂર્ણ છે કારણ કે આ દિવસે સાઉથના સુપરસ્ટાર ચિરંજીવીએ 1978માં ભારતીય ફિલ્મ ઈન્ડસ્ટ્રીમાં પોતાની ફિલ્મ કરિયરની શરૂઆત કરી હતી. છેલ્લા 45 વર્ષમાં ચિરંજીવીએ 156 ફિલ્મોના 537 ગીતોમાં 24,000 ડાન્સ સ્ટેપ કર્યા છે. ચિરંજીવીનું નામ ગિનિસ વર્લ્ડ રેકોર્ડમાં સામેલ થતાં જ ભારતમાં દરેક વ્યક્તિના ચહેરા પર ગર્વ અને ખુશી છવાઈ છે. અભિનેતાને આ સન્માન બીજા કોઈએ નહીં પણ સુપરસ્ટાર આમિર ખાને આપ્યું હતું.
આજે 22 સપ્ટેમ્બરે હૈદરાબાદમાં આમિર ખાને ચિરંજીવીને ગિનિસ વર્લ્ડ રેકોર્ડ આપીને તેમની પ્રશંસા કરી હતી. બોલિવૂડ સુપરસ્ટારે ભારતીય સિનેમાના મેગાસ્ટારને પ્રેમ અને આદરના પ્રતીક માની ગળે લગાવ્યા હતાં. ગિનીસ વર્લ્ડ રેકોર્ડ ઈવેન્ટમાં ચિરંજીવી માટેના તેમના ભાષણમાં આમિરે કહ્યું,’અહીં આવવું મારા માટે આનંદ અને સન્માનની વાત છે. ચિરંજીવી ગારુના ચાહકોને જોઈને હું ખુશ છું અને મને તમારી વચ્ચે સામેલ કરવા બદલ તમારો આભાર માનું છું કારણ કે હું પણ તેમનો મોટો પ્રશંસક છું.’
આમિર ખાને ચિરંજીવીનું સન્માન કર્યું
બોલિવૂડના મિસ્ટર પરફેક્શનિસ્ટ આમિર ખાને આગળ કહ્યું,’હું તેને મારા મોટા ભાઈની જેમ જોઉં છું. જ્યારે ચિરંજીવી ગારુએ મને ફોન કર્યો અને મને આ ઈવેન્ટમાં આમંત્રિત કરવા માંગતા હતા ત્યારે મને ખબર નહોતી કે તે મને કેમ બોલાવી રહ્યાં છે પરંતુ મેં તેમને પહેલેથી જ કહ્યું હતું કે તમારે માત્ર ઓર્ડર આપવાનો છે, કોઈ માંગ નથી. હું ખૂબ જ ખુશ છું કે ચિરંજીવી ગારુને આ સન્માન આપવામાં આવ્યું છે. હું આ જાણીને ખુબ જ ખુશ છું, અદ્ભુત સાંજ અને ઉજવણીનો ભાગ બનવા માટે ખુશ છું.’
ચિરંજીવીના ફેમસ ડાન્સ મૂવ્સ વિશે વાત કરતા આમિર ખાને કહ્યું, ‘જો તમે તેના કોઈપણ ગીતો જોશો, તો તમે જોશો કે તેમનું દિલ જાણે ડાન્સમાં ડૂબી જાય છે. તેને ઘણો આનંદ આવે છે. આપણે ક્યારેય તેના પરથી નજર હટાવતા શકતા નથી કારણ કે તે ખૂબ જ સારા અભિનેતા છે. બીજી તરફ ચિરંજીવીએ ઈવેન્ટમાં બધાને સંબોધતા કહ્યું કે તેણે ક્યારેય વિચાર્યું ન હતું કે તે ગિનીસ વર્લ્ડ રેકોર્ડ ધારક બની જશે. જો કે, તેમણે શ્રોતાઓનો આભાર માન્યો અને લોકોએ તેમના ભાષણને વધાવ્યું હતું.
