બાબરી વિધ્વંસ કેસ : અયોધ્યાના વિવાદિત સ્ટ્રક્ચર ડિમોલિશન કેસમાં પૂર્વ નાયબ વડાપ્રધાન લાલકૃષ્ણ અડવાણી સહિત તમામ આરોપીઓને બુધવારે મોટી રાહત મળી છે. હાઈકોર્ટની લખનૌ બેંચે અડવાણી, મુરલી મનોહર જોશી, ઉમા ભારતી સહિત અન્ય આરોપીઓને નિર્દોષ જાહેર કરવા સામે દાખલ કરવામાં આવેલી અરજીને ફગાવી દીધી છે. જસ્ટિસ રમેશ સિંહાની અધ્યક્ષતાવાળી બે સભ્યોની બેન્ચે 31 ઓક્ટોબરે પોતાનો નિર્ણય સુરક્ષિત રાખ્યો હતો.
આ મામલે રિવિઝન પિટિશન દાખલ કરવામાં આવી હતી
આ અપીલ અયોધ્યાના રહેવાસી હાજી મહેબૂબ અહેમદ અને સૈયદ અખલાખ અહેમદ વતી કોર્ટમાં દાખલ કરવામાં આવી હતી. શરૂઆતમાં આ મામલે રિવિઝન પિટિશન દાખલ કરવામાં આવી હતી. કોર્ટે તેને ફોજદારી અપીલમાં ફેરવવાનો આદેશ આપ્યો હતો. આ મામલે સીબીઆઈ વતી વાંધો પણ દાખલ કરવામાં આવ્યો હતો. સીબીઆઈએ કહ્યું કે અપીલકર્તાઓ વિવાદિત માળખાને તોડી પાડવાના કેસનો ભોગ બન્યા નથી. તેથી હાલની અપીલ સીઆરપીસીની કલમ 372ની જોગવાઈ હેઠળ દાખલ કરી શકાતી નથી. અપીલકર્તાઓનું કહેવું છે કે વિવાદિત માળખાને તોડી પાડવાના કારણે તેઓ આ કેસમાં પીડિત પક્ષે છે. તેથી તેને સેશન્સ કોર્ટના નિર્ણયને પડકારવાનો અધિકાર છે.
આ પહેલા તમામને વિશેષ અદાલતે નિર્દોષ જાહેર કર્યા હતા
આ પહેલા પૂર્વ નાયબ વડાપ્રધાન લાલકૃષ્ણ અડવાણી, પૂર્વ કેન્દ્રીય મંત્રી મુરલી મનોહર જોશી, પૂર્વ રાજ્યપાલ કલ્યાણ સિંહ, પૂર્વ મુખ્યમંત્રી ઉમા ભારતી, સાંસદ સાક્ષી મહારાજ, લલ્લુ સિંહ અને બ્રિજભૂષણ શરણ સિંહ સહિત તમામને વિશેષ અદાલતે નિર્દોષ જાહેર કર્યા હતા.
28 વર્ષ પછી આવ્યો નિર્ણય
6 ડિસેમ્બર 1992ના રોજ અયોધ્યામાં વિવાદિત ઢાંચાને તોડી પાડવાના કેસમાં 28 વર્ષ બાદ ચુકાદો આવ્યો હતો. સ્પેશિયલ સીબીઆઈ કોર્ટે તમામ આરોપીઓને નિર્દોષ જાહેર કરતા કહ્યું હતું કે ડિમોલિશનનું આયોજન કરવામાં આવ્યું ન હતું. નેતાઓના ભાષણનો ઓડિયો સ્પષ્ટ નથી. નેતાઓએ ટોળાને રોકવાનો પણ પ્રયાસ કર્યો હતો. ન્યાયાધીશે કહ્યું કે આરોપી વિરુદ્ધ કોઈ પુરાવા નથી. આ ઘટના અચાનક બની હોવાનું કહેવાય છે.
