ફિલ્મ ‘અર્જુન’ (1985)ના દરેક પાત્રમાં યોગ્ય કલાકાર હોય એની નિર્દેશક રાહુલ રવૈલે કાળજી રાખી હતી. સનીના મિત્રો 
તરીકે રાજા બુંદેલા અને સત્યજીત પસંદ થયા હતા. પરેશ રાવલ, પ્રેમ ચોપડા, ગોગા કપૂર, શફી ઇનામદાર વગેરેની પસંદગી એમના પાત્ર માટે એકદમ યોગ્ય હતી. રાહુલ કોઈ હીરોઈન વગર ફિલ્મ બનાવવા માગતા હતા પરંતુ નિર્માતાઓએ જરૂર સમજી હોવાથી પહેલાં અમૃતા સિંહની પસંદગી થઈ હતી. ધર્મેન્દ્રએ પદ્મિની કોલ્હાપુરેનું નામ સૂચવ્યું હતું. ત્યારે ફિલ્મ ‘મંઝિલ મંઝિલ’ (1984) માં સાથે કામ કરતાં સનીને ડિમ્પલ સાથે મિત્રતા થઈ હોવાથી એના માટે આગ્રહ કર્યો હતો એટલે હીરોઈન તરીકે ડિમ્પલ કાપડિયાની પસંદગી થઈ હતી.
ફિલ્મ જ્યારે તૈયાર થઈ ત્યારે રાહુલે ડિમ્પલનો રોલ કાઢી નાખવાનું નક્કી કર્યું હતું. એમને લાગ્યું કે એની ભૂમિકાની કોઈ જરૂર નથી. નિર્માતાએ સલાહ આપી કે એ વધારે પડતું કહેવાશે અને આમ કરવાથી ફિલ્મની લંબાઈ 18 મિનિટ ઘટી જશે. તેથી રાહુલે મુખ્યત્વે ગીતોવાળી ડિમ્પલની ભૂમિકા રહેવા દીધી હતી. કેમકે એક્શન ફિલ્મમાં ગીતોને કારણે દર્શકોને થોડો આરામ મળે એમ હતો. ક્લાઇમેક્સ સની અને રાજકિરણ પર જ ફિલ્માવવામાં આવ્યો હતો. રાહુલે ક્લાઇમેક્સમાં છેલ્લે હીરો- હીરોઈનને મળતા બતાવ્યા ન હતા તેથી ડિમ્પલ દેખાઈ ન હતી.
પહેલાં ફિલ્મનું શુટિંગ લાલબાગના જાહેર સ્થળે કરવાના હતા. બહુ ભીડ ભેગી થવાના ડરથી રાજકમલ સ્ટુડિયોના બહારના ભાગમાં એવા જ મહોલ્લાનો સેટ ઊભો કરવામાં આવ્યો હતો. એક દિવસ રાજ કપૂર સ્ટુડિયોના માલિક વી. શાંતારામને મળવા આવ્યા અને ‘અર્જુન’ નો વાસ્તવિક લાગે એવો સેટ જોઈ ખુશી વ્યક્ત કરી હતી અને માહોલને વધુ આધારભૂત બનાવવા અહીં સીટી બસ ચલાવવી જોઈએ એવું સૂચન કર્યું હતું. રાહુલને એ સૂચન ગમ્યું હતું અને સ્ટુડિયોની બાજુમાં જ બસ ડેપો હોવાથી ત્યાં વાત કરીને બસ મેળવવાનું નક્કી કરવામાં આવ્યું હતું. અને બસ સાથે કેટલાક દ્રશ્યો ફિલ્માવ્યા હતા.
ફિલ્મમાં એક એક્શન દ્રશ્યમાં છત્રીઓ પકડીને જતાં લોકોનું દ્રશ્ય યાદગાર બની રહ્યું છે. ફિલ્મમાં ગુંડાઓ તલવાર સાથે પાછળ પડ્યા હોવાથી સનીનો મિત્ર સત્યજીત ભાગી રહ્યો હોય છે. ત્યારે વરસાદ હોય છે અને મોટી સંખ્યામાં લોકો છત્રી લઈને જતાં હોય છે. એમાં માત્ર મોહનનો અને મારનારનો ચહેરો જ બતાવવાનો હતો. છત્રી ઓઢીને જતાં લોકો વચ્ચેથી એ બચવાનો પ્રયાસ કરે છે પણ માર્યો જાય છે. આ દ્રશ્યમાં લોકો વધારે દેખાય એ માટે એક જણને બે છત્રી પકડાવવામાં આવી હતી. 1000 જુનિયર આર્ટિસ્ટ સાથેના ત્રણ મિનિટના આ દ્રશ્યનું શુટિંગ કરવામાં બે દિવસ લાગ્યા હતા.
