દેશામાં હાલ સમર વેકેશન ચાલી રહ્યું છે, લોકો વેકેશનને યાદગાર બનાવવા માટે નવી નવી જગ્યાએ જવાનું પસંદ કરતા હોય છે. પરંતુ સેલિબ્રિટીઓ અને ટોચના એક્ઝિક્યુટિવ્સનાં વેકેશન અલગ રીતે જ મનાવતાં હોય છે. તેઓ પરંપરાગત વેકેશનને બદલે અવનવી જગ્યાએ જવાનું પસંદ કરે છે અને એકદમ અનોખી રીતે હોલિડે સેલિબ્રેટ કરતાં હોય છે.
એક દિવસનો ખર્ચ 1.85થી 4 સુધીનો ખર્ચ…
આ એક્ઝિક્યુટિવ્સ હોલિડેમાં આંધળો ખર્ચ કરતા હોય છે. વિવિધ કંપનીઓના પ્રમોટર્સ, અલગ-અલગ કેટેગરીના ચીફ એક્ઝિક્યુટિવ્સનો હોદ્દો ધરાવતા પ્રોફેશનલ્સ તથા સિનિયર પ્રોફેશનલ્સ લક્ઝરી ટ્રિપ દરમિયાન એક દિવસમાં એક વ્યક્તિ પાછળ ₹1.85 લાખથી ₹4 લાખનો ખર્ચ કરે છે. તેમના વેકેશનમાં ઇગ્લૂમાં રોકાણ કરવાનો, આફ્રિકામાં ખાનગી સ્થળોએ ચિત્તાનું સાઇટ-સીઇંગ, આયર્લેન્ડમાં ગ્લેશિયર અને વોલ્કેનો મેડિટેરેનિયનમાં પ્રાઇવેટ યોટિંગનો સમાવેશ થાય છે.
તાજેતરમાં એક કંપનીના પ્રમોટર-CEO તેમના પરિવાર સાથે સ્પેનિશ ટાપુ ઇબિઝા ગયા હતાં. તેમની પસંદ ચોક્કસ હતી અને તેઓ કાળા રંગની યોટ ભાડે લેવા માંગતા હતાં. તેમના ટ્રાવેલ પ્લાનર્સે ટોચથી લઈને બોટમ સુધીનાં તમામ સ્થળોએ શોધ કરી પરંતુ કાળા રંગની યોટ મળી નહીં કારણ કે, તેનું મેન્ટેનન્સ મોંઘું હોય છે અને આથી આ ટાપુમાં તેને રાખનારા કોઈ નથી.
છેલ્લે તેમને ક્રિસ્ટિઆનો રોનાલ્ડોની યોટ મળી, જેનું છ કલાકનું ભાડું ₹21 લાખ હતું, જે સફેદ યોટ કરતાં લગભગ ત્રણ ગણું ભાડું છે. તેમના છ સભ્યોના પરિવારે ભાડે લીધેલા પ્રાઇવેટ પ્લેન અને ટોપ-એન્ડ હોટેલ્સના ભાડા સાથે આઠ દિવસની ટ્રિપ 78 લાખમાં પડી હતી.
અન્ય એક કંપનીના પ્રમોટર તાજેતરમાં પેરિસ ગયા હતા અને તેમને પેઇન્ટિંગમાં ખૂબ રસ હોવાથી તેમણે દરરોજ આર્ટ હિસ્ટોરિયન સાથે સમય ગાળવાનું નક્કી કર્યું હતું. એક દિવસ ક્લાસિકલ આર્ટ તો બીજા દિવસે કન્ટેમ્પરરી પેઇન્ટિંગ્સ તો ત્રીજા દિવસે આર્ટ ક્રિટિક્સ. આર્ટના આ નિષ્ણાને એક દિવસ માટે સાથે રાખવાનો ખર્ચ ₹1 લાખની આસપાસ હોય છે.
હોલિડેને વધારે યાદગાર બનાવવા અને દુર્લભ અનુભવ મેળવવા માટે હાઈ-એન્ડ ટ્રાવેલર્સ પૈસાની સામે નથી જોતા. જે જગ્યાએ કે સ્થળે અગાઉ કોઈ ન ગયું હોય ત્યાં જવાનો ક્રેઝ હવે નથી, પરંતુ આજના ધનિક પ્રવાસીઓ એવું કરવા માંગે છે જે પહેલાં ક્યારેય કોઈએ ન કર્યું હોય.
બૂટિક ટ્રાવેલ ડિઝાઇન કંપની એક્સપરિએન્ટલ ટ્રાવેલ જર્નીઝના CEO અમિત કલસીએ કહ્યું કે, તેમનો એક ક્લાયન્ટ ચીલીની ખીણમાં જઈને સૂર્યગ્રહણનો નજારો માણવા આતુર છે, જેના માટે પાંચ દિવસની ટ્રિપનો ખર્ચ ₹60 લાખ થશે. અનેક દેશોનો પ્રવાસ કરી ચૂકેલા અને હરવા-ફરવાનો શોખ પૂરો કરવા માટે મન મૂકીને પૈસા વાપરી શકે તેવા લોકો અનોખો અનુભવ મેળવવા માટે હંમેશા અધીરા રહે છે.
ખાસ પ્રકારની ટૂર કરાવતી કંપની ધી Q એક્સપીરિયન્સિસના સ્થાપક વસીમ શૈખ આ વખતે લક્ઝરી ક્રૂઝની ટ્રિપનું આયોજન કરી રહ્યા છે, જેની એક વ્યક્તિની ટિકિટ રૂ.15.25 લાખ સુધીની છે અને તેમાં હવાઈ ભાડું સામેલ નથી. આ ટ્રિપમાં કેટરિંગની જવાબદારી સેલેબ્રિટી શેફ વિકી રત્નાનીની રહેશે.
કોક્સ & કિંગ્સના હેડ (રિલેશનશિપ્સ) કરણ આનંદ કહે છે કે, આ ઉનાળા માટે તેમણે ઇટલીની ખાસ ટ્રિપનું આયોજન કર્યું છે, જેમાં માથા દીઠ ખર્ચ 30 લાખ છે. આ ટ્રિપમાં ગ્લાસ-મેકિંગ વર્કશોપની પ્રાઇવેટ વિઝિટ અને વાઇન-ટેસ્ટિંગ સેશન્સનો સમાવેશ થાય છે.
