જમ્મુ-કાશ્મીરના ડોડા જિલ્લામાં શનિવારે માત્ર 4 કલાક 38 મિનિટના ટૂંકા ગાળામાં ભૂકંપના ત્રણ આંચકા અનુભવાયા હતા. આ ત્રણેય ભૂકંપના કેન્દ્રબિંદુ અંદાજે પૂર્વ-પશ્ચિમ દિશામાં એક જ સીધી રેખામાં નોંધાયા છે, જેનો કુલ વિસ્તાર આશરે 11.5 કિલોમીટર સુધી ફેલાયેલો છે.
આ ત્રણેય ભૂકંપની તીવ્રતા રિક્ટર સ્કેલ પર અનુક્રમે 2.7, 3.8 અને 2.9 માપવામાં આવી હતી. ભૂકંપના કેન્દ્રબિંદુ જમીનની સપાટીથી 5 થી 10 કિલોમીટરની ઊંડાઈએ નોંધાયા છે. આ આંચકાઓમાં સૌથી વધુ 3.8ની તીવ્રતા ધરાવતો ભૂકંપ જમીનથી માત્ર 5 કિલોમીટરની ઊંડાઈએ આવ્યો હતો.
મર્યાદિત ભૌગોલિક વિસ્તારમાં ભૂકંપના કેન્દ્રબિંદુઓનું લગભગ એક જ સીધી રેખામાં હોવું એ એક અત્યંત વિશિષ્ટ બાબત માનવામાં આવે છે. ઉલ્લેખનીય છે કે ડોડા-કિશ્તવાડ વિસ્તાર અગાઉથી જ ભૂસ્તરીય દ્રષ્ટિએ અત્યંત સંવેદનશીલ અને જટિલ રચના ધરાવતો પ્રદેશ ગણાય છે. આ વિસ્તારમાં ભૂતકાળમાં પણ મોટા આંચકા અનુભવાયા છે, જેમાં વર્ષ 2013માં કિશ્તવાડ ખાતે 5.7ની તીવ્રતાનો અને વર્ષ 2023માં ડોડા ખાતે 5.4ની તીવ્રતાનો ભૂકંપ આવ્યો હતો.