સંગીતની વાત આવે ત્યારે આજની જેન ઝી જનરેશનની પસંદગ અલગ જ હોય છે. જેન ઝી યુવાનોનો પૉપ મ્યુઝિક, ગિટાર અને પિયાનો જેવા સાધનોમાં વધારે રસ જોવા મળે છે. ત્યારે આ ગુજરાતી યુવાને ભારતીય શાસ્ત્રીય સંગીતની પસંદગી કરી તે વારસાને નવી પેઢી સુધી લઈ જવાનું નક્કી કર્યુ.
આપણે વાત કરવાની છે તબલા વાદક જેન ઝી યુવાન વેદ પ્રજાપતિની. વેદ ચીનમાં 110મા એશિયન ગેમ્સમાં તબલા વાદક તરીકે ભારતનું પ્રતિનિધિત્વ કરનાર સૌથી નાની ઉંમરનો કલાકાર છે. મૂળ કડી કલોલના આ યુવાએ એમસ યુનિવર્સિટીમાં માસ્ટર કર્યુ છે. તે છેલ્લા ઘણા સમયથી તબલા વગાડે છે. કોઈ પણ સંગીત કે ધૂનને થોડો મોર્ડન ટચ આપી અનોખી રીતે પ્રસ્તુતી કરવાનો હંમેશાં તેમનો પ્રયાસ રહ્યો છે. ઈન્સ્ટાગ્રામ પર તેની જબરી ફેન ફોલોઈંગ છે. સોશિયલ મીડિયાના યુગમાં વેદ પણ પોતાની કળાને લોકો સુધી પહોંચાડવામાં પાછળ રહ્યો નથી, ઈન્સ્ટાગ્રામ પર તેના અનેક વીડિયો છે, જેમાં તેની તબલા વગાડવાની કળાને જોઈ શકાય છે.
મજા માટે શરૂ કરેલા તબલાએ બતાવ્યો કરિયરનો માર્ગ
23 વર્ષીય વેદે ચિત્રલેખા ડૉટ કૉમ સાથે વાત કરતાં કહ્યું કે,’સૌથી પહેલા હું ઢોલ વગાડતો હતો. સ્કૂલમાં બીજા ધોરણમાં હતો ત્યારે મેં ઢોલ વગાડવાનું શરૂ કર્યુ હતું. વિવિધ સ્પર્ધાઓમાં પાંચ વખત સ્ટેટ લેવલ પર ઢોલે મને જીત અપાવી છે. મારા પપ્પા અને દાદાનો બહુ સહકાર રહ્યો. ઢોલની સાથે સાથે તેમણે મને તબલા પણ ખરીદી આપ્યા હતાં. શરૂઆતમાં તબલા પણ હું ઢોલ જેમ જ વગાડતો હતો. ધીમે ધીમે તબલામાં મારો રસ વધતો ગયો અને મારા ફન માટે શરૂ કરેલા તબલા મારી કારકિર્દી તરફ દોરી ગયા. મેં કડીમાં શાસ્ત્રીય તબલાની તાલીમ લીધી અને પછી વીડિયો બનાવવાનું શરૂ કર્યુ. હું શું નવું કરી શકું એવા વિચાર સાથે હેમરથી તબલા વગાડવાનો વીડિયો બનાવ્યો. મારો પહેલો વીડિયો ‘ગેંદા ફુલ’ વાયરલ થયો અને લોકોએ તેને ખૂબ પસંદ કર્યો. બસ, આવી રીતે મારી તબલાની સફર થઈ.’
વેદ જેમ જેમ વીડિયો બનાવતા ગયા એમ તેમની ઓળખ બનતી ગઈ. ઈન્સ્ટાગ્રામ પર ફોલોઅસર્નો આંકડો પણ વધવા લાગ્યો. જેના કારણે તેને વિવિધ બ્રાન્ડ્સની જાહેરાતો અને પ્રમોશન માટે ઓફર મળવા લાગી. આ સાથે જ નાણાકીય આવક પણ શરૂ થઈ ગઈ. જયારે તેનો યશ રાજ ફિલ્મ પ્રોડક્શનમાંથી પ્રમોશન માટે સંપર્ક થવા લાગ્યો ત્યારે તેને સંપૂર્ણપણે આત્મવિશ્વાસ આવ્યો કે તે હવે આ જ દિશામાં આગળ વધશે.
એશિયન ગેમ્સમાં ભારત અને તબલાનું પ્રતિનિધિત્વ કર્યુ
એક દિવસ મને મેઈલ મળ્યો, એ પણ સ્પેમમાં. જેમાં ખબર પડી કે ભારતમાંથી દસ તબલા વાદકને પસંદ કરવામાં આવ્યા છે, જેમાં મારું નામ પણ હતું. આમાંથી જે એક વ્યક્તિની પસંદગી થાય તેને ચીનમાં એશિયન ગેમ્સ 2023 ઓપનિંગ સેરેમનીમાં પર્ફોમ કરવા મળશે. પહેલા તો વિશ્વાસ જ ન આવ્યો. લાગ્યું કે આ નકલી મેઈલ છે, પણ ખરેખર એવું નહોતું. વિવિધ દેશોમાંથી કલાકારોને બોલાવવા આવ્યા હતાં. તબાલ વાદક તરીકે મારી પસંદગી થઈ.પહેલા એશિયન ગેમ્સ માટે વન એશિયા એન્થમ સોન્ગ રેકોર્ડ કરવાનું હતું, જેનું શૂટ બાલીમાં હતું. ત્યાં અન્ય દેશોમાંથી આવેલા કલાકારને પણ મળ્યો. બાદમાં 110મી ચીનમાં એશિયન ગેમ્સ સ્પર્ધાની ઓપનિંગ સેરેમનીમાં લાઈવ પર્ફોમ કર્યુ. જેનો અનુભવ ખૂબ જ અદ્ભૂત રહ્યો. જેમિંગ સેશન કર્યા. ભાષા અવરોધને કારણે અમે બધા કાલાકરો એકાબીજા સાથે ઈન્સ્ટ્રુમેન્ટથી વાત કરતાં હતા, એવું વેદે ચિત્રલેખાને જણાવ્યું.
આમ, ગુજરાતનો વેદ પ્રજાપતિ એશિયન ગેમ્સમાં ભારત અને તબલાનું પ્રતિનિધિત્વ કરનાર સૌથી યુવા કલાકાર બની ગયો. આંતરરાષ્ટ્રીય સ્તર પર પર્ફોમ કર્યા બાદ વેદ માને છે કે માત્ર ટેલેન્ટ મહત્વનું નથી તમારું વલણ અને વર્તન પણ એટલું જ અગત્યનું છે.
તબલામાં આખું બ્રહ્માંડ
જો તમે એકવાર તબલા વગાડવામાં ઓતપ્રોત થઈ જાઓ તો તમને કંઈજ દેખાતું નથી. વેદે કહ્યું કે મેં ક્યાંક સાંભળ્યુ હતું કે તબલામાં આખું બ્રહ્માંડ છે. ખરેખર એ સાચું લાગી રહ્યું છે.વેદે એમએસ યુનિવર્સિટીમાંથી માસ્ટર કર્યુ છે. આગળ હવે તેને તબલામાં પીએચડી કરવાનો વિચાર છે. દરેક વ્યક્તિનો કોઈ પ્રેરણા સ્ત્રોત હોય છે. વેદ માટે તેના માતા-પિતા જ તેની પ્રેરણા છે. ભારતીય સંસ્કૃતિ અને કળાને જાળવી અનિવાર્ય છે. વેદ પ્રજાપતિ તમામ જેન ઝી યુવાનો માટે એક પ્રેરણા છે, જે શાસ્ત્રીય સંગીતના વારસાને આગળ ધપાવવામાં પોતાનું યોગદાન આપી રહ્યા છે
(નિરાલી કાલાણી, મુંબઈ)
