ગુજરાત રાજ્યભરમાં મહાવીર જયંતીનો ઉત્સાહ ચારેબાજુ જોવા મળી રહ્યો છે. અમદાવાદ, વડોદરા, સુરત અને રાજકોટ જેવા મહત્વના શહેરોમાં જૈન સમાજે આ પવિત્ર દિવસને હર્ષ અને ઉલ્લાસથી ઉજવ્યો છે. વડોદરામાં જૈન સમુદાયે ભવ્ય શોભાયાત્રા સાથે ઉત્સવની શરૂઆત કરી, જ્યારે અમદાવાદ અને સુરતમાં પણ ધામધૂમથી શોભાયાત્રાઓ યોજાઈ.
અમદાવાદમાં મહાવીર જૈન કલ્યાણ મહોત્સવના ભાગરૂપે એક વિશાળ કાર્યક્રમનું આયોજન થયું. આ ઉજવણીમાં 20 કિલોમીટરની રથયાત્રા પ્રભાવશાળી રહી, જેમાં હજારો જૈન શ્રદ્ધાળુઓએ ભાગ લીધો. 7થી 10 હજાર લોકોએ બાઇક અને ગાડીઓની રેલી સાથે ઉત્સાહ દર્શાવ્યો. ચાંદીના ખાસ રથમાં મહાવીર સ્વામીની મૂર્તિ સ્થાપિત કરીને તેમના સિદ્ધાંતોનો પ્રચાર કરાયો. વડોદરામાં બેન્ડવાજા અને ઢોલ-નગારાના સ્વરો સાથે ધર્મયાત્રા યોજાઈ, જેમાં ચારેય જૈન ફિરકાના સંઘો એકતાથી જોડાયા. ઘોડા, બગીઓ અને ટેમ્પોમાં વિવિધ વેશધારી બાળકોએ આ શોભાયાત્રાને રંગીન બનાવ્યું. રાજકોટમાં મણિયારા દેરાસરથી શરૂ થયેલી ધર્મયાત્રામાં હજારો લોકોએ ભાગ લઈ મહાવીરના સંદેશને પ્રસારિત કર્યો. સુરતમાં ડાંગી નૃત્યની સાથે શોભાયાત્રા યોજાઈ, જેમાં મહાવીર માટે ખાસ રથ તૈયાર થયો. 108થી વધુ સજાવટવાળી કારો અને 500 બાઇક-સ્કૂટરની રેલીએ શહેરને ભક્તિમય બનાવ્યું.
