અમદાવાદઃ રાજ્યમાં નકલી ખાદ્ય વસ્તુ, નકલી અધિકારી, નકલી ટોલનાકા, નકલી કોર્ટ બાદ શિક્ષણ વિભાગના નકલી ઓર્ડર પણ મળવા લાગ્યો છે. બનાસકાંઠામાં બ્રિજેશ પરમાર નામના શિક્ષકે શિક્ષણ વિભાગના સચિવનો ડુપ્લિકેટ લેટર બનાવી બદલીનો ઓર્ડર આપ્યો હોવાની ઘટના બની છે.
વડગામની મજાદર પ્રાથમિક શાળાના શિક્ષકનું આ કારસ્તાન હોવાનું સામે આવ્યું છે.જોકે નકલી હુકમ સામે આવતાં જ શિક્ષણ અધિકારીએ તાત્કાલિક પગલાં લીધાં હતાં. શિક્ષક બ્રિજેશ પરમારને સસ્પેન્ડ કરી પોલીસ ફરિયાદના આદેશ પણ આપ્યા છે.
શું છે મામલો?
બનાસકાંઠાના વડગામની મજાદર પ્રાથમિક શાળાના શિક્ષક બ્રિજેશ પરમારે શિક્ષણ વિભાગના સચિવના સહી અને સિક્કા કરી બદલીનો નકલી ઓર્ડર બનાવ્યો હતો. હાલ બદલીનો કેમ્પ યોજાયો હતો, જેમાં શિક્ષકોની બદલી કરવામાં આવી હતી. ત્યાર બાદ મજાદર પ્રાથમિક શાળાના શિક્ષક બ્રિજેશ પરમારે નકલી સહી-સિક્કા સાથેનો ઓર્ડર બનાવી થરાદની ડુવા પ્રાથમિક શાળાના શિક્ષકને આ ઓર્ડર આપી દીધો હતો. આ શિક્ષક જ્યારે જેતે સમયે બદલીના ઓર્ડર મુજબ અન્ય શાળામાં હાજર થવા ગયા ત્યારે આ ઘટનાનો પર્દાફાશ થયો હતો.
