રાજકોટ: રાજકોટ સેન્ટ્રલ જીએસટીમાં બોગસ પેઢી નોંધાવી તેના આધારે 61.38 લાખની ઈનપુટ ટેક્ષ ક્રેડિટ મેળવી લેવાયાના કૌભાંડ અંગે રાજકોટ ક્રાઈમ બ્રાંચમાં ફરિયાદ નોંધાઈ છે. જેના આધારે ઈઓડબલ્યુ, ક્રાઈમ બ્રાંચ અને એસઓજીની ટીમોએ રાજયભરમાં આજ સવારથી દરોડા પાડી કુલ પાંચ આરોપીઓની ધરપકડ કરી હતી. આ સમગ્ર કૌભાંડ અંગે વીસેક દિવસ પહેલાં ક્રાઈમ બ્રાંચને માહિતી મળી હતી. જેના આધારે ઈઓડબલ્યુએ તપાસ શરૂ કરી હતી. તપાસના અંતે સેન્ટ્રલ જીએસટીના અધિકારી જયપ્રકાશ સિંગે આજે રાજકોટ ક્રાઈમ બ્રાંચમાં ફરિયાદ નોંધાવી હતી. જેના આધારે ક્રાઈમ બ્રાંચે બોગસ દસ્તાવેજો બનાવી તેનો ખરા તરીકે ઉપયોગ કરવાની, છેતરપિંડી અને ગુનાઈત કાવત્રા સહિતની કલમો હેઠળ ગુનો દાખલ કર્યો હતો.
પ્રાપ્ત માહિતી પ્રમાણે ફરિયાદમાં જણાવાયું હતું કે જૂન-ર૦ર૩થી સપ્ટેમ્બર ર૦ર૩ દરમિયાન કોઈપણ શખ્સે પરમાર એન્ટરપ્રાઈઝ નામથી બનાવટી ભાડા કરાર બનાવી તેને સેન્ટ્રલ જીએસટીની રેસકોર્સ રિંગરોડ સ્થિત ઓફિસમાં રજૂ કરી જીએસટી નંબર મેળવી લીધા હતા. જે બાદ અન્ય 14 કંપનીઓના સંચાલકો સાથે મળી ગુનાઈત કાવતરૂ રચી, બોગસ બિલીંગ કરી, બનાવટી દસ્તાવેજો અને ખોટી રજૂઆતોના આધારે રૂ 61.38 લાખની કિંમતની બોગસ ઈનપુટ ટેક્ષ ક્રેડિટ મેળવી સરકારને નુકસાન પહોંચાડાયું હતું.
ફરિયાદમાં આરોપી તરીકે અન્ય જે પેઢીઓના નામો દર્શાવાયા છે તેમાં યશ ડેવલોપર, ઈકરા એન્ટરપ્રાઈઝ, સિવીલ પ્લસ એન્જીનિયરીંગ, ધનશ્રી મેટલ, આર્યન એસોસિએટ, જયોતિ ઈન્ફાસ્ટ્રકચર, અહાર્મ સ્ટીલ, રિધ્ધી ઈન્ફાસ્ટ્રકચર, આશાપુરા ટ્રેડિંગ, શિવ મિલન પ્લાસ્ટીક અને ગ્લોબટ્રા ઈમ્પેકસ, માં દુર્ગા સ્ટીલ, મારૂતિનંદન કન્સ્ટ્રકશન ઉપરાંત લખુભા નાનભા જાડેજાનો સમાવેશ થાય છે. આ ઉપરાંત EOWના PI સંજયસિંહ જાડેજાએ આ કેસમાં કુલ પાંચ આરોપીઓની ધરપકડ કરી છે. જેમાં અમન નાશીરભાઈ કારાણી, અમન રફિકભાઈ બીનહરીશ, સૈયદ ઉર્ફે કાનુ મજીદભાઈ સારી, વિશાલ પ્રવિણભાઈ પરમાર અને પાર્થ સતિષભાઈ પરમારનો સમાવેશ થાય છે. જેમાં અમન મૂળ ભાડા કરાર કરનાર છે. તેને બીજા અમને ભાડા કરાર કરાવી આપ્યા હતા. જયારે સૈયદ ઉર્ફે કાળુએ ધમભાના કહેવાથી ભાડા કરાર કર્યા હતા. વિશાલે મૂળ માલિક સાથે પાર્થના કહેવાથી ભાડા કરાર કર્યા હતા. આ કૌભાંડમાં જે-જે પેઢીઓએ આર્થિક લાભ લીધો છે તેના સંચાલકોની ધરપકડ કરાશે.
