મહેસાણા: ગુજરાતમાં ફરી માનવના કંપાવીદે તેવી ઘટના પ્રકાશમાં આવી છે. વાત એમ છે કે, શેઢાવી ગામમાં એક યુવકના લગ્નને એક મહિના પહેલા જ યુવકને દારૂ પીવડાવી નસબંધી કરાવી દેવાના સમાચાર મળી રહ્યા છે. આ ઘટનાને હજુ એક દિવસ વિત્યો નથી ત્યાં આ જ વિસ્તારમાં જમનાપુરમાં એક 30 વર્ષીય પરિણીત યુવકની બારોબાર નસબંધી કરી દેવામાં બીજી ઘટના સામે આવી છે. આ ઘટનાને પગલે રાજ્ય આરોગ્ય વિભાગ સામે શંકાની આંગળી ચિંધાઈ છે. સમગ્ર રાજ્યમાં કુટુંબ નિયોજન પખવાડિયાની ઉજવણી થઈ રહી છે. ત્યારે આરોગ્ય કર્મચારીઓ અવનવા અખતરાં કરી નસબંધી માટે ટાર્ગેટ પૂર્ણ કરી રહ્યાં છે. આવી ઘટનાને પગલે લોકોમાં રોષ ભભૂક્યો છે.
ઉલ્લેખનીય છે કે પાછલા થોડાક જ સમયમાં આરોગ્ય વિભાગમાં અલગ અલગ રીતે થતી છેતરામણીને લઈ જનતામાં આરોગ્ય વિભાગ પર વિશ્વાસ ઉડવા લાગ્યો છે. ગુજરાતમાં આરોગ્ય ક્ષેત્રે કેટલી હદે પોલંપોલ ચાલે છે તે ખ્યાતિકાંડ પછી નસબંધીકાંડ પરથી સાબિત થઈ રહ્યુ છે. સૂત્રો પાસેથી મળતી માહિતી અનુસાર, આ ઘરકંકાસ થતા યુવકને છોડી પત્નિ પિયર પહોંચી ગઈ હતી. ઝઘડો એટલી હદે વધ્યો કે, બંનેએ છૂટાછેડા લીધા હતાં. આખરે આ યુવકના પરિવારજનોએ મહિના પછી લગ્ન કરવાનું નક્કી કર્યુ હતું. ત્યાં એક આરોગ્ય કર્મચારીએ યુવકને ખેતરમાં મજૂરીની લાલચ આપી હતી. આ યુવકનું કહેવુ છે કે, મને એક એમ્બ્યુલન્સમાં બેસાડીને અડાલજની સરકારી હોસ્પિટલે લઈ જવાયો હતો. જ્યાં ફોર્મ ભરીને બ્લડ ટેસ્ટ કરવામાં આવ્યા હતાં. ત્યારબાદ નસબંધીનું ઓપરેશન કરી દેવાયુ હતું. ઓપરેશન થયા બાદ બે હજાર રૂપિયા આપવામાં આવ્યા હતાં. આ ઘટના હજુ લોકો ભૂલ્યાં નથી ત્યાં મહેસાણા જિલ્લાના જ જમનાપુર ગામમાં એક ઠાકોર યુવકની પણ બારોબાર નસબંધી કરી દેવામાં આવી હતી. હકીકતમાં નિયમ એવો છે કે, પુરુષની નસબંધીના ઓપરેશન હોય તો! પત્નિની મંજૂરી લેવી ફરજિયાત છે. એમ છતાંય નિયમોનું પાલન થતું નથી. ચર્ચા એવી છે કે, અડાલજની સરકારી હોસ્પિટલ જ નસબંધી કાંડનું એપી સેન્ટર રહ્યુ છે. જ્યાં પરિણીત જ નહીં, કુંવારા યુવકોની બારોબાર નસબંધી કરી દેવામાં આવી રહી છે.
નવી શેઢાવી બાદ જમનાપુરમાં જ નસબંધીકાંડ બહાર આવ્યું છે ત્યારે મહેસાણા જિલ્લા કલેક્ટરે સમગ્ર ઘટનાની તપાસના આદેશ આપ્યાં છે. મહેસાણા જિલ્લા આરોગ્ય વિભાગની ટીમ પણ જમનાપુર પહોંચી છે. અન્ય ગામોમાં પણ બારોબાર નસબંધી થઈ છે કે કેમ? કેટલાં યુવકોની બારોબાર નસબંધી કરવામાં આવી છે તેની તપાસ કરવામાં આવી રહી છે.
