મોદી એમના સંબોધનમાં દેશના વિરોધપક્ષોને ટોણો મારવાનું ચૂક્યા નહોતા. એમણે કહ્યું, ‘એકબીજા પર ભરોસો રાખવાથી આપણે મજબૂત બનીએ છીએ, પરંતુ આજે જ્યારે દેશમાં કેટલાક સ્થળોને આપવામાં આવેલા વિદેશી આક્રમણખોરોના નામોને બદલવામાં આવે છે એમાં કેટલાક લોકો અસ્વસ્થ થઈ જાય છે.’ મોદીએ કોરોનાવાઈરસ રોગચાળા સામે દેશે આદરેલા જંગમાં પુણે શહેરે આપેલા યોગદાનની મોદીએ પ્રશંસા કરી હતી.

આ કાર્યક્રમ વખતે મંચ પર રાષ્ટ્રવાદી કોંગ્રેસ પાર્ટી (એનસીપી)ના પ્રમુખ શરદ પવાર પણ ઉપસ્થિત હતા. એમણે કહ્યું, ભારતમાં પહેલો સર્જિકલ હુમલો છત્રપતિ શિવાજી મહારાજના સમયગાળામાં થયો હતો. દેશે બે યુગ જોયા છેઃ એક, તિલકનો અને બીજો મહાત્મા ગાંધીનો.

મોદી સવારે પુણે આવી પહોંચ્યા બાદ દગડુશેઠ મંદિર ખાતે ભગવાન ગણપતિજીના દર્શન અને પૂજા કરશે. ત્યારબાદ 11.15 વાગ્યે એમને ‘લોકમાન્ય તિલક પુરસ્કાર’ એનાયત કરવામાં આવશે. મહાન રાષ્ટ્રવાદી, શિક્ષક અને અગ્રગણ્ય સ્વાતંત્ર્ય સેનાની ‘લોકમાન્ય’ બાલ ગંગાધર તિલકની આજે પુણ્યતિથિ છે. 1920ની 1 ઓગસ્ટે મુંબઈમાં એમનું દેહાવસાન થયું હતું.