ઢાકા – ભારતની હોકી ટીમે આજે અહીં પાકિસ્તાન પર વધુ એક મોટો વિજય હાંસલ કર્યો છે. સુપર-4 રાઉન્ડમાં પોતાની છેલ્લી મેચમાં ભારતે કટ્ટર હરીફ પાકિસ્તાનને 4-0થી કચડી નાખ્યું છે અને ફાઈનલમાં પ્રવેશ કર્યો છે.
રવિવારે ભારતીય સમય મુજબ સાંજે 5.00 વાગ્યે રમાનાર ફાઈનલમાં ભારતનો મુકાબલો મલેશિયા સામે થશે જેણે દક્ષિણ કોરિયા સાથેની મેચ 1-1થી ડ્રો કરીને ફાઈનલમાં પ્રવેશ કર્યો છે.
ભારતે આ સ્પર્ધામાં અગાઉ રાઉન્ડ-રોબીનમાં મલેશિયાને 6-2થી હરાવ્યું હતું.
આજની મેચમાં ભારત વતી ગોલ કરનાર ખેલાડીઓ હતા – સતબીર સિંહ (39મી મિનિટે), હરમનપ્રીત સિંહ (51મી મિનિટે), લલિત ઉપાધ્યાય (52) અને ગુરજન્ત સિંહ (57મી મિનિટે).
સ્પર્ધામાં ભારત અત્યાર સુધી અપરાજિત રહ્યું છે અને ટીમ ટોપ રેન્ક રહી છે.
આ વર્ષમાં ભારતની હોકી ટીમનો પાકિસ્તાન પર આ ચોથો વિજય હતો. આ પહેલાં ભારત તેના પડોશીને લંડનમાં હોકી વર્લ્ડ લીગમાં બે વાર અને અહીં એશિયા કપમાં રાઉન્ડ-રોબીન લીગમાં હરાવી ચૂક્યું હતું.
