ગોલ્ડ કોસ્ટ (ઓસ્ટ્રેલિયા) – ભારતની સ્ટાર બેડમિન્ટન ખેલાડી સાઈના નેહવાલે અહીં 21મી કોમનવેલ્થ ગેમ્સમાં આજે મહિલાઓની બેડમિન્ટનમાં સિંગલ્સનો ગોલ્ડ મેડલ જીત્યો છે. ફાઈનલ મેચમાં એણે ભારતની જ ઓલિમ્પિક્સ સિલ્વર મેડલવિજેતા પી.વી. સિંધુને સીધી ગેમ્સમાં 2-0થી પરાજય આપ્યો છે.
આમ, આ હરીફાઈનો ગોલ્ડ અને સિલ્વર બંને ભારતને મળ્યા છે.
સિંગલ્સ ફાઈનલમાં સાઈનાએ સિંધુને 21-18, 23-21થી હરાવી હતી. આ મેચ રોમાંચક બની રહી હતી અને ઓસ્ટ્રેલિયાના દર્શકોને એનો આનંદ માણવા મળ્યો હતો.
કોમનવેલ્થ ગેમ્સમાં સાઈનાનો આ બીજો સિંગલ્સ ગોલ્ડ મેડલ છે. 2010ની દિલ્હી ગેમ્સમાં પણ એ ચેમ્પિયન બની હતી.
આજની ફાઈનલમાં સાઈનાએ જોરદાર આક્રમક અને પાવરપેક્ડ પરફોર્મન્સ બતાવ્યો હતો. એને કારણે સિંધુ પર શરૂઆતથી જ પ્રેશર બની રહ્યું હતું. જોકે સિંધુએ છેવટ સુધી સાઈનાને લડત જરૂર આપી હતી. એને કારણે જ મેચ એકતરફી ન બની જતાં રોમાંચક રહી હતી.
