કારગિલ વિજય દિવસઃ સેના કેમ્પસમાં CMએ અર્પી શ્રદ્ધાંજલિ, આર્મી એક્સપિડિશન…

ગાંધીનગરઃ ગુજરાતના મુખ્યપ્રધાન વિજય રૂપાણીએ ૨૦માં કારગિલ વિજય દિવસ અવસરે અમદાવાદમાં સેનાના ગોલ્ડન કટાર ડિવિઝનના સેનામથકે શહીદ સ્મારક ખાતે વીર સેનાનીઓને શ્રદ્ધાંજલિ અર્પણ કરી કૃતજ્ઞતા પ્રગટ કરી હતી. મુખ્યપ્રધાને ૧૯૯૯ના કારગિલ યુદ્ધના ભવ્ય વિજયને વધાવતા સ્પષ્ટપણે જણાવ્યું કે આ વિજય સહિત ભારતે દુશ્મન દેશ સાથેના તમામ યુદ્ધમાં શૌર્ય-વીરતા અને પરાક્રમથી વિજય પ્રાપ્ત કર્યો છે, જેનાથી દેશ આખો ગૌરવાન્વિત છે.

મુખ્યપ્રધાને ભારતીય સેનાના વીર જવાનોની શહાદતને નમન કરતા રાજ્યના સૌ નાગરિક ભાઈ-બહેનોને દેશહિત સર્વોપરીનો ભાવ જગાવી ‘દેશ માટે જીવવું – દેશ માટે મરવું’નો શૌર્યસભર કોલ આપ્યો હતો. તેમણે આ સંદર્ભમાં ‘‘હમ દિન ચાર રહે ન રહે, માં તેરા વૈભવ અમર રહે…’’ની પંક્તિઓ પણ દોહરાવી હતી.

મુખ્યપ્રધાન રૂપાણીએ ગુજરાતી યુવાઓ સેનામાં જોડાવા માટે વ્યાપકપણે પ્રેરિત થાય તેવું વાતાવરણ નિર્માણ કરવા વધુ પ્રમાણમાં આર્મી ભરતી મેળા યોજવાની તથા રાજ્યમાં વધુ સૈનિક સ્કૂલ્સ શરૂ કરવાની પણ નેમ વ્યક્ત કરી હતી.

તેમણે આ સાથે જ ગોલ્ડન કટાર ડિવિઝન યોજિત શસ્ત્ર પ્રદર્શની ખુલ્લી મુકી સેનાના શસ્ત્રોનું રસપૂર્વક નિરીક્ષણ પણ કર્યું હતું. તેમણે ૪,૨૦૦ કિ.મી.નો ૮ રાજ્યોનો પ્રવાસ પૂર્ણ કરી અમદાવાદ આવેલા આર્મી મોટરસાયકલ એક્સ્પિડિશનનું સમાપન કરાવતા વીર સેનાનીઓને અભિનંદન પાઠવ્યાં હતાં.

મુખ્યપ્રધાને ગુજરાત જેવા સીમાવર્તી રાજ્યની દુશ્મન દેશને અડીને આવેલી સરહદની નિગેહબાની કરતા અને સમાજજીવનને શાંતિ-સલામતીનો અહેસાસ કરાવતા સેનાના ગોલ્ડન કટાર ડિવિઝનની સેવાઓ અને સેનાનીઓની ફરજપરસ્તી- દિલેરીને પણ બિરદાવી હતી. આ પ્રસંગે બલરામ થાવાણી, ગૃહ વિભાગના અધિક મુખ્ય સચિવ પંકજકુમાર, ગોલ્ડન કટાર ડિવિઝનના જનરલ ઓફિસર કમાન્ડીંગ – મેજર જનરલ સંજય શર્મા, બ્રિગેડિયર એ. કે. સિંગ તેમજ ૧૧મી ઇન્ફન્ટ્રી ડિવિઝનના અફસરો, નિવૃત્ત અધિકારીઓએ પણ ઉપસ્થિત રહી શહીદ વીર સેનાનીઓને શ્રદ્ધાંજલિ આપી હતી.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]