બૉલિવૂડ અભિનેત્રી સંગીતા બિજલાનીના પુણે સ્થિત ફાર્મ હાઉસમાં તોડફોડ કરી ચોરોએ તેમના ઘરમાંથી ઘણી કિંમતી વસ્તુઓની ચોરી કરી છે. અભિનેત્રી ઘણા દિવસોથી ફાર્મ હાઉસની મુલાકાત લીધી ન હતી અને જ્યારે તે ત્યાં પહોંચી ત્યારે તે તેના ઘરની હાલત જોઈને દંગ રહી ગઈ.
સંગીતાએ લોનાવાલા ગ્રામીણ પોલીસમાં ચોરીની ફરિયાદ નોંધાવી છે, ત્યારબાદ પોલીસે હવે આ મામલાની તપાસ શરૂ કરી છે. સંગીતાનું ફાર્મ હાઉસ લોનાવાલા નજીક પવન માવલ વિસ્તારમાં છે જ્યાં ગઈકાલે રાત્રે કોઈએ ચોરી કરી હતી. જ્યારે આ ઘટના બની ત્યારે સંગીતા કે તેના નોકરો ઘટનાસ્થળે હાજર નહોતા.
સંગીતા બિજલાનીના ફાર્મ હાઉસમાં ચોરી
પુણે ગ્રામીણ પોલીસમાં નોંધાવેલી ફરિયાદ મુજબ અભિનેત્રી સંગીતા બિજલાનીએ જણાવ્યું હતું કે,’ફાર્મહાઉસનો મુખ્ય દરવાજો અને બારીની ગ્રીલ તૂટેલી હતી. એક ટીવી સેટ ગાયબ હતો, બેડ અને રેફ્રિજરેટર સહિત ઘણી કિંમતી ઘરવખરીનો સામાન ગાયબ હતો. આ ઉપરાંત સીસીટીવી કેમેરા પણ તૂટેલા હતા.’ સંગીતાએ પુણે ગ્રામીણ એસપી સંદીપ સિંહ ગિલને જણાવ્યું હતું કે,’મારા પિતાની તબિયત ખરાબ હોવાને કારણે હું ફાર્મ હાઉસ જઈ શકી ન હતી… પરંતુ આજે જ્યારે હું મારા બે ઘરના હાઉસહેલ્પ સાથે ફાર્મ હાઉસ ગઈ ત્યારે મેં જોયું કે મુખ્ય દરવાજો તૂટેલો હતો. જ્યારે અમે અંદર ગયા ત્યારે મારી કિંમતી વસ્તુઓ ચોરાઈ ગઈ હતી.’
હિન્દી સિનેમાની ફિટ અને સુંદર અભિનેત્રી સંગીતા બિજલાનીએ માત્ર 16 વર્ષની ઉંમરે મોડેલિંગ શરૂ કર્યું હતું. 1980માં મિસ ઈન્ડિયાનો તાજ જીત્યા બાદ સંગીતાએ બોલિવૂડમાં પ્રવેશ કર્યો અને પ્રખ્યાત થઈ, ત્યારબાદ તે ‘ત્રિદેવ’, ‘વિષ્ણુ દેવા’ અને ‘યુગંધર’ જેવી ફિલ્મોમાં જોવા મળી. 80 અને 90 ના દાયકામાં બોલિવૂડમાં સક્રિય સંગીતાએ પોતાની કારકિર્દીમાં ‘હથિયાર’, ‘યોદ્ધા’, ‘ઇજ્જત’ અને ‘યુગંધર’ સહિત ઘણી ફિલ્મોમાં કામ કર્યું.
