English Version
મહાત્મા ગાંધીનો સંદેશ: પહેલાં સ્વયંને બદલો
એક મહિલા એના પુત્રની સાકર વધારે પડતી ખાવાની આદતથી પરેશાન હતી. ઘણું સમજાવ્યો તે છતાં દીકરો એ આદત છોડતો નહોતો.
મહિલાને થયું દીકરાને પોતાના પ્રેરણામૂર્તિ ગાંધીજી પાસે લઈ જાઉં, બાપુની સલાહ માનીને દીકરો આદત છોડી દેશે એવો એને વિશ્વાસ હતો.
દીકરાને એ અમદાવાદમાં ગાંધીજી પાસે એમના આશ્રમમાં લઈ ગઈ અને કહ્યું:
‘બાપુ, મારો દીકરો સાકર બહુ ખાય છે. એના સ્વાસ્થ્ય માટે એ સારું નથી. કૃપા કરીને તમે એને આ આદત છોડી દેવાનું કહો.’
બાપુએ મહિલાની વાત શાંતિથી સાંભળી, પણ એમણે છોકરાને કોઈ સલાહ આપવાની ના પાડી, અને મહિલાને કહ્યું:
‘તમે ઘેર પાછાં ફરો, બે અઠવાડિયાં પછી ફરી આવો.’
મહિલા થોડીક નારાજ થઈ. એણે કહ્યું: ‘બાપુ અમે બહુ દૂરથી, તકલીફ વેઠીને આવ્યાં છીએ.’ પરંતુ બાપુ માન્યા નહીં.
મહિલા ઘેર પાછી ફરી. બે અઠવાડિયાં પછી ફરી દીકરાને બાપુ પાસે લઈ આવી.
ત્યારે બાપુએ છોકરાને ઉદ્દેશીને કહ્યું:
‘જો બેટા, તું સાકર ખાવાનું છોડી દે. તારા સ્વાસ્થ્ય માટે એ સારું નથી.’
છોકરો સાંભળીને સ્તબ્ધ થઈ ગયો, અને સાકર ખાવાની આદત છોડી દેવાનું વચન આપ્યું.
માતાને આશ્ચર્ય થયું. એણે બાપુનો આભાર માન્યો, પણ પૂછ્યું:
‘તમે આ જ સલાહ પેલા દિવસે કેમ નહોતી આપી? એને માટે બે અઠવાડિયાં કેમ લીધાં?’
બાપુએ હસીને નમ્રતાપૂર્વક જવાબ આપ્યો:
‘જુઓ બહેન, બે અઠવાડિયાં પહેલાં હું પોતે પણ સાકર ખાતો હતો.‘
