ઉબરને ભારતમાં એર ટેક્સી સેવા શરૂ કરવામાં રસ છે

રાઈડશેરિંગ કંપની ઉબરનો દાવો છે કે જો એને મુંબઈમાં પોતાની એર ટેક્સી સેવા શરૂ કરવા દેવામાં આવે તો લોકોનો ટ્રાવેલ સમય 90 ટકા જેટલો ઘટી શકે છે.

ઉબર તેની એર ટેક્સી સેવાના સૌપ્રથમ કમર્શિયલ લોન્ચિંગ માટે અમેરિકાના બે શહેર પસંદ કર્યા છે – ડલ્લાસ અને લોસ એન્જલિસ. આ બે શહેરમાં તે 2023ની સાલ સુધીમાં એર ટેક્સી સેવા શરૂ કરવાની છે. હવે તે આ યાદીમાં કોઈક ત્રીજા શહેરનો પણ ઉમેરો કરવા માગે છે.

આ માટે એણે અમેરિકાની બહારના પાંચ દેશોને પસંદ કર્યા છે – ભારત, જાપાન, ઓસ્ટ્રેલિયા, બ્રાઝિલ અને ફ્રાન્સ. આ પાંચમાંથી તે કોઈ એક દેશ અને એના કોઈ એક શહેરને પસંદ કરશે.

ઉબર એવિએશન પ્રોગ્રામના ચીફ એક્ઝિક્યૂટિવ એરિક એલિસનનું કહેવું છે કે મુંબઈમાં પશ્ચિમી ઉપનગરમાં આવેલા એરપોર્ટથી મુંબઈના દક્ષિણ ભાગમાં આવેલા ચર્ચગેટ સુધી રોડ માર્ગે જવું હોય તો  100-મિનિટનો સમય લાગે છે. પણ જો ઉબેરની એર ટેક્સી સેવા શરૂ થાય તો એ અંતર ઘટીને માત્ર 10 મિનિટનું થઈ જાય.

એર ટેક્સી સેવામાં, હેલિકોપ્ટર જેવા અને મલ્ટીપલ રોટર્સ (પંખા)વાળા વાહનોને ઉતારવા માટે બહુમાળી ઈમારતોની અગાશીનો ઉપયોગ કરવામાં આવશે અને ખાસ સ્કાયપોર્ટ્સ પણ બાંધવામાં આવશે.

આ વાહનો નીચી સપાટીએ ઉડશે જેથી હવાઈસીમાને જેટ વિમાનો માટે મુક્ત રાખી શકાય અને ધ્વનિ સ્તર પણ ઓછું રહે.

અમેરિકાસ્થિત ઉબર કંપનીને એની સેવા શરૂ કરવા માટે ભારતની પસંદગી કરવામાં રસ છે, કારણ કે અમેરિકાની બહાર ભારતને એ તેની સૌથી મોટી માર્કેટ ગણે છે.

મુંબઈ, દિલ્હી, કોલકાતા અને બેંગલુરુ જેવા ભારતના મોટા શહેરોમાં ટ્રાફિક-જામની સમસ્યા ખૂબ રહેતી હોય છે. એને કારણે દર વર્ષે રૂ. 1.5 લાખ કરોડની આર્થિક ખોટ જાય છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]