સુરક્ષાની દ્રષ્ટિએ મુંબઈ એરપોર્ટનો દુનિયામાં જોટો જડે એમ નથી

ભારતમાં સુરક્ષા બંદોબસ્તની દ્રષ્ટિએ સૌથી સલામત એરપોર્ટ કયું?

વર્લ્ડ ક્વોલિટી કોંગ્રેસ (WQC)ના મતે એવું એરપોર્ટ મુંબઈ છે. આ જાગતિક ક્વોલિટી રેટિંગ એજન્સીએ મુંબઈને માત્ર ભારતનું જ નહીં, સમગ્ર વિશ્વમાં સૌથી મજબૂત સુરક્ષા કવચ ધરાવતું એરપોર્ટ ગણાવ્યું છે.

મુંબઈના મુંબઈના છત્રપતિ શિવાજી મહારાજ ઈન્ટરનેશનલ એરપોર્ટ સહિત ભારતભરના વિમાનીમથકો પર સુરક્ષા વ્યવસ્થા સંભાળવાનું કામ CISF (સેન્ટ્રલ ઈન્ડસ્ટ્રિયલ સિક્યૂરિટી ફોર્સ) એજન્સી કરે છે.

મુંબઈના એરપોર્ટ માટેનો આ એવોર્ડ CISF એજન્સીને આવતા મહિને દુબઈમાં નિર્ધારિત વિશેષ કાર્યક્રમમાં એનાયત કરવામાં આવશે.

આ એવોર્ડની પસંદગી માટે વર્લ્ડ ક્વોલિટી કોંગ્રેસ સંસ્થા નિષ્પક્ષ રીતે મૂલ્યાંકન કરે છે.

વર્લ્ડ ક્વોરિટી કોંગ્રેસનું કહેવું છે કે CISF જે સુરક્ષા પૂરી પાડે છે તે વિશ્વના અન્ય કોઈ પણ શહેરના એરપોર્ટ કરતાં બેસ્ટ છે.

મુંબઈ એરપોર્ટનું રેટિંગ વધારનાર આ છે મુદ્દા

મુંબઈ એરપોર્ટ પર બેગેજ ટેગ સ્ટેમ્પિંગ પ્રથાને બંધ કરવા સહિત જે કેટલાંક મહત્વના પગલાં લેવામાં આવ્યા છે એનાથી તેનું રેટિંગ ખૂબ સુધરી ગયું અને એવોર્ડ જીતવામાં તેને સહાયતા મળી છે.

બેગેજ ટેગ સ્ટેમ્પિંગ પ્રથાને બંધ કરીને પ્રવાસીઓને આપેલી રાહત, CISFના જવાનો, કર્મચારીઓ દ્વારા શિષ્ટાચાર, મદદ કરવાના સ્વભાવ, પ્રવાસીઓ સામાન ભૂલી જાય તો એની સંભાળ રાખવા, CISFના જવાનોની હાજરીમાં પોતે સુરક્ષિત હોવાની પ્રવાસીઓએ વ્યક્ત કરેલી લાગણી જેવી બાબતોને ધ્યાનમાં લઈને વર્લ્ડ ક્વોલિટી કોંગ્રેસે રેટિંગ નક્કી કરીને મુંબઈ એરપોર્ટને બેસ્ટ ઘોષિત કર્યું છે.

ઉલ્લેખનીય છે કે મુંબઈ એરપોર્ટ પર CISF એજન્સીએ બેગેજ ટેગિંગ અને સ્ટેમ્પિંગની પદ્ધતિને તાજેતરમાં જ બંધ કરી દીધી છે. તદુપરાંત એરપોર્ટ પર પ્રવાસીઓની સંખ્યા સતત વધી રહી હોવા છતાં CISF એજન્સીએ સુરક્ષા વ્યવસ્થાને પ્રશંસનીય રીતે સંભાળી છે, સ્ક્રીનિંગ પોઈન્ટ્સ ખાતે પ્રવાસીઓના વેઈટિંગ ટાઈમમાં ઘટાડો થયો છે, પ્રવાસીઓનું તેમજ હેન્ડ બેગ્સનું સિક્યૂરિટી સ્ક્રીનિંગ વ્યાપક રીતે કરવામાં આવે છે.

મુંબઈ એરપોર્ટ પર CISFની કામગીરી

CISF એજન્સી મુંબઈમાં 59 સિવિલ એરપોર્ટ્સ પર સુરક્ષા વ્યવસ્થા સંભાળે છે.

મુંબઈ એરપોર્ટ ભારતમાં દિલ્હી બાદ બીજા નંબરનું સૌથી વ્યસ્ત એરપોર્ટ છે. અહીં ગયા વર્ષે 4 કરોડ 52 લાખ પ્રવાસીઓની અવરજવર રહી હતી. મુંબઈ એરપોર્ટ ભારતનું હાઈપરસેન્સિટીવ એરપોર્ટ ગણવામાં આવે છે.

CISF એજન્સી 2002ની સાલથી મુંબઈ એરપોર્ટ પર સુરક્ષા વ્યવસ્થા સંભાળે છે. અહીં ડોમેસ્ટિક તથા ઈન્ટરનેશનલ એમ બંને ટર્મિનલ, ઉપરાંત કાર્ગો કોમ્પલેક્સ, સાંતાક્રુઝ એર કાર્ગો ટર્મિનલ, એરસાઈડ પેરીમીટર દીવાલ અને શહેર બાજુના એપ્રોચ રોડ પર 5000 જેટલા જવાનો સુરક્ષા વ્યવસ્થા સંભાળે છે.

CISFના જવાનો એરપોર્ટ પર પ્રવાસીઓની જાંચ કરવા ઉપરાંત એમનાં હેન્ડબેગેજનું સ્ક્રીનિંગ કરે છે, સીસીટીવી દ્વારા દેખરેખ રાખે છે, એની ક્વિક રીએક્શન ટીમ, એન્ટી-હાઈજેકિંગ રીસ્પોન્સ ટીમ છે અને વીઆઈપી વ્યક્તિઓના પ્રવેશ વખતે પરિસ્થિતિને સંભાળવા જેવી બાબતો માટે જવાબદારી નિભાવે છે.

ગયા વર્ષે શ્રેષ્ઠ સુરક્ષાના મામલે દિલ્હી એરપોર્ટ એવોર્ડવિજેતા બન્યું હતું. ગયા વર્ષે સર્વેક્ષણ એરપોર્ટ સર્વિસ ક્વોલિટી એજન્સીએ કરાવ્યું હતું.

(ક્રિકેટર ઈરફાન પઠાણ શું કહે છે, મુંબઈ એરપોર્ટની સુરક્ષા વ્યવસ્થા વિશે)

httpss://twitter.com/IrfanPathan/status/832916678400933888