અમેરિકા: કેલિફોર્નિયામાં પેસિફિક મહાસાગર પર સ્થિત કોસ્ટલ હમ્બોલ્ટ કાઉન્ટીના નાના શહેર ફર્ન્ડેલ નજીક સવારે 10:44 વાગ્યે જબરદસ્ત ભૂકંપ નોંધાયો આવ્યો હતો. ભૂકંપના જોરદાર આંચકા અનુભવાયા બાદ સુનામીની ચેતવણી જારી કરવામાં આવી હતી. યુ.એસ.એ.ના ઉત્તરી કેલિફોર્નિયામાં ભૂકંપના જોરદાર આંચકા અનુભવાયા હતા. ત્યારબાદ અધિકારીઓએ સુનામીની ચેતવણી જારી કરી હતી. જે બાદમાં રદ કરવામાં આવી હતી. આ પછી હળવા આંચકા પણ અનુભવાયા હતા.
યુ.એસ.જી.એ તેની સત્તાવાર વેબસાઇટ પર જણાવ્યું છે, “આ ભૂકંપ ઉત્તરી કેલિફોર્નિયાના દરિયાકિનારે મેન્ડોસિનો ફ્રેક્ચર ઝોનની નજીકમાં, કેલિફોર્નિયાના ફર્ન્ડેલથી લગભગ 100 કિ.મી. દક્ષિણ-પશ્ચિમમાં આવ્યો હતો. આ ધરતીકંપ મેન્ડોસિનો ટ્રિપલ જંક્શન નજીક આવ્યો હતો. આ એ વિસ્તાર છે જ્યાં પેસિફિક, ઉત્તર અમેરિકા અને જુઆન ડી ફુકા/ગોર્ડા પ્લેટો ભેગી થાય છે.”
ભૂકંપની અસર દક્ષિણમાં સાન ફ્રાન્સિસ્કો સુધી અનુભવાઈ હતી. જ્યાંના રહેવાસીઓએ કેટલીક સેકન્ડો સુધી ભૂકંપનો આંચકો અનુભવ્યો હતો. આ પછી ઘણા નાના આંચકા આવ્યા હતા. ભૂકંપના કારણે લોકો ઘરની બહાર નીકળી ગયા હતા. જો કે, ભૂકંપથી કોઈ મોટા નુકસાન કે જાનહાનિના તાત્કાલિક અહેવાલો આવ્યા નથી.
સુનામીની ચેતવણી લગભગ એક કલાક સુધી અમલમાં રહી. તે ધરતીકંપ પછી તરત જ જારી કરવામાં આવી હતી અને કેલિફોર્નિયામાં મોન્ટેરી ખાડીથી ઓરેગોન સુધી લગભગ 805 કિલોમીટરનો દરિયાકિનારો તેમાં આવરી લેવામાં આવ્યો હતો. સાન ફ્રાન્સિસ્કોના બે એરિયા રેપિડ ટ્રાન્ઝિટ ડિસ્ટ્રિક્ટ (BART) એ સાન ફ્રાન્સિસ્કો અને ઓકલેન્ડને જોડતી પાણીની અંદરની ટનલ મારફતે તમામ દિશાઓમાં સેવાઓ સ્થગિત કરી દીધી હતી.
