સુરત: શહેરના પુણા કુંભારિયા રોડ પર આવેલ કેન્સર હોસ્પિટલની સામે 2 રાઉન્ડ ફાયરિંગ અને મારામારીની ઘટના ઘટી હતી. ધોળા દિવસે ફાયરિંગ થતા સમગ્ર પંથકમાં ચકચાર મચી ગઈ હતી. પોલીસે સીસીટીવી ફૂટેજમાં કેદ થયેલ ઘટનાની કાયદાકીય તપાસ હાથ ધરી છે. ફાયરિંગ કર્યા બાદ આરોપીઓ ઘટના સ્થળેથી ફરાર થઈ ગયા હતા.
ભરત કેન્સર હોસ્પિટલની બહાર એક યુવક પર પાંચ જણાએ હુમલો કર્યો હતો અને બે રાઉન્ડ ફાયરિંગ કર્યું હતું. સદનસીબે યુવક બચી ગયો હતો પણ ફાયરીંગના અવાજને પગલે આજુબાજુના લોકોમાં ફફડાટ ફેલાયો હતો. બનાવની જાણ થતાની સાથે જ પોલીસનો કાફલો ઘટના સ્થળે પહોંચી ગયો હતો.
પોલીસે ભરત કેન્સર હોસ્પિટલના સીસીટીવી ફૂટેજ કબ્જે લીધા હતા. ઘટનાના સીસીટીવી ફૂટેજમાં બે યુવક રસ્તાના કિનારે ઉભા છે, ત્યારે એક બ્લ્યુ કલરની કાર આવે છે. કારની અંદરથી પાંચ શખ્સ હથિયાર સાથે બહાર નીકળે છે. ત્યાર બાદ ઉભેલા યુવકો સાથે મારપીટ કરે છે. દરમિયાન એક યુવક આડેધડ ફાયરિંગ કરે છે અને હુમલા બાદ બધા ભાગી છૂટે છે.
અરવિંદ ગોંડલિયા (સુરત)
