નવી દિલ્હીઃ ભારતીય ક્રિકેટ ટીમના દંતકથાસમાન કેપ્ટન અને ઓલરાઉન્ડર કપિલ દેવને હૃદયરોગનો હુમલો આવ્યા બાદ અહીંની હોસ્પિટલમાં દાખલ કરવામાં આવ્યા છે.
કપિલ દેવે તેમના સુકાનીપદ હેઠળ 1983માં ભારતને પહેલી જ વાર ક્રિકેટ વર્લ્ડ કપ અપાવ્યો હતો.
હોસ્પિટલમાં કપિલ દેવ પર એન્જિયોપ્લાસ્ટી સારવાર કરવામાં આવી છે. એમની તબિયત સ્થિર છે અને ભયમુક્ત છે.
1983ની પ્રુડેન્શિયલ વર્લ્ડ કપ સ્પર્ધાની ફાઈનલ મેચમાં કપિલ દેવની આગેવાની હેઠળ ભારતે વેસ્ટ ઈન્ડિઝને ધૂળ ચાટતું કર્યું હતું. ભારત અને એશિયાની કોઈ ટીમનું એ પહેલું જ વર્લ્ડ કપ વિજેતાપદ હતું.
કપિલ દેવે એમની આંતરરાષ્ટ્રીય ક્રિકેટ કારકિર્દીમાં ટેસ્ટ ક્રિકેટમાં 5000થી વધુ રન કર્યા હતા અને 434 વિકેટ લીધી હતી.
ટેસ્ટ ક્રિકેટમાં કપિલ સૌથી વધુ વિકેટ લેનાર ભારતીય ફાસ્ટ બોલર છે.
