મુંબઈઃ કાંદિવલી એજ્યુકેશન સોસાયટી સંચાલિત બી.કે. શ્રોફ ડિગ્રી અને જુનિયર કોલેજ ઓફ આર્ટ્સ અને કોમર્સના ગુજરાતી સાહિત્ય મંડળે કવિ નર્મદની ૧૯૦મી જન્મજયંતિની ઉજવણી અનોખી રીતે કરી.
‘ચાલો મળીએ એક ગરવા ગુજરાતીને’ શિર્ષક હેઠળ એક અનોખી મુલાકાત વિદ્યાર્થીઓ સાથે આયોજિત થઈ. ગત તારીખ 29 ઓગસ્ટના રોજ કાર્યક્રમમાં ગુજરાતી નાટ્યજગતના ખ્યાતનામ યુવા અભિનેતા, નિર્માતા, દિગ્દર્શક કમલેશ ઓઝા ઉપસ્થિત રહ્યા હતા. ગુજરાતી માધ્યમથી ભણેલા આ કલાકારે ભાષાથી કોઈ પણ ક્ષેત્રમાં નિપુણતા મેળવી શકાય છે એમ સમજાવ્યું હતું અને વિદ્યાર્થીઓનો આત્મવિશ્વાસ વધાર્યો હતો. એમણે કહ્યું કે, પ્રયત્ન સતત કરો બાકી સફળતા આપમેળે મળશે. સફળતા માટે આત્મવિશ્વાસ અને સતત ધગશ રાખવી.
એમણે વિદ્યાર્થીઓનાં પ્રશ્નોના ઉત્તર પણ આપ્યા હતા. મંડળના પ્રમુખ ડો. લીલી ભૂષણનો સહકાર અને સંસ્થાના ટ્રસ્ટીમંડળનું પ્રોત્સાહન મળતાં કાર્યક્રમનું આયોજન ઉત્સાહસભર રહ્યું.
