મુંબઈઃ વર્ષ 2024ના આરંભે મુંબઈવાસીઓને એક વધુ મેટ્રો લાઈનનો લાભ મળતો થશે. કોલાબા-બાન્દ્રા-સીપ્ઝ વિસ્તારોને જોડતી ‘મેટ્રો લાઈન-3’ જેને ‘એક્વા લાઈન’ તરીકે પણ ઓળખવામાં આવશે આવતા વર્ષના આરંભમાં શરૂ થવાની ધારણા છે. આ લાઈન શરૂ થવાથી ખાસ કરીને દક્ષિણ મુંબઈમાં વસતા લોકોને ઘણી રાહત થશે. આ લાઈનના પ્રથમ ચરણનું ઉદઘાટન વર્ષારંભે કરાશે. દક્ષિણ મુંબઈના નેવી નગરથી ઉત્તર મુંબઈના આરે ડેપો સુધીની આ 34 કિલોમીટર લાંબી લાઈન પર કુલ 37 સ્ટેશન હશે. એમાં વચ્ચે બાન્દ્રા, બીકેસી, સીપ્ઝ (સાંતાક્રૂઝ) પણ વિસ્તારોને પણ આવરી લેવામાં આવશે. પ્રથમ ચરણમાં અંધેરી-એમઆઈડીસી મેટ્રો સ્ટેશનનું કામ લગભગ પૂરું થઈ ગયું છે તેથી નવા વર્ષથી મુંબઈગરાઓને નવી મેટ્રોમાં પ્રવાસ કરવા મળશે. મુંબઈની આ પહેલી જ ભૂગર્ભ મેટ્રો હશે.
(તસવીર સૌજન્યઃ @AshwiniBhide)
મેટ્રો-3 લાઈનનું બાંધકામ મહારાષ્ટ્ર સરકાર સંચાલિત મુંબઈ મેટ્રો રેલ કોર્પોરેશન લિમિટેડ કરી રહી છે. આ લાઈન પર કોલાબાથી બાન્દ્રા સુધીનો રૂટ અન્ડરગ્રાઉન્ડ છે. આ લાઈન ચાલુ થયા બાદ દરરોજ આશરે સાડા ચાર લાખ વાહન ફેરી ઘટી જવાની ધારણા રખાય છે. મતલબ કે ટ્રાફિક બોજો સારો એવો ઘટી જશે અને વાયુ પ્રદૂષણ પણ ઘટશે. રસ્તાઓ પર વાહનો ઓછા થવાથી પ્રદૂષિત કાર્બન વાયુનું પ્રમાણ સારું એવું ઘટી જશે.
