મુંબઈ: શિવસેના ઉદ્ધવ જૂથે મહારાષ્ટ્ર વિધાનસભા ચૂંટણી માટે 15 ઉમેદવારની બીજી યાદી જાહેર કરી છે. શિવસેનાએ અત્યાર સુધીમાં 80 ઉમેદવારોની જાહેરાત કરી છે. શનિવારની યાદીમાં શિવડી બેઠક પરથી અજય ચૌધરીને ટિકિટ આપવામાં આવી છે. મનોજ જામસુતકરને ભાયખલાથી, સંદેશ પારકરને કણકવલી બેઠક પરથી ઉમેદવાર બનાવવામાં આવ્યા છે. જ્યારે વડાલા બેઠક પરથી શ્રદ્ધા જાધવને ટિકિટ આપવામાં આવી છે.
પાર્ટીએ 23 ઓક્ટોબરે જાહેર કરેલી યાદીમાં 65 ઉમેદવારોની જાહેરાત કરી હતી. શિવસેના ઉદ્ધવ જૂથ સહિત તમામ MVA પક્ષો 85-85 બેઠકો પર ચૂંટણી લડી રહ્યા છે. ઉદ્ધવ જૂથે હજુ 5 વધુ બેઠકો માટે ઉમેદવારની જાહેરાત કરવાની બાકી છે. ઉમેદવારોએ 29મી ઓક્ટોબર સુધી ઉમેદવારી પત્ર ભરવાના રહેશે.
