તુર્કેઈમાં એક ફેક્ટરીમાં ભયાનક વિસ્ફોટ થયાની ઘટના સામે આવી રહી છે. મળતી માહિતી અનુસાર આ વિનાસક વિસ્ફોટમાં અંદાજિત 12 લોકોના મોત થયા હોવાનું સૂત્રોના અહેવાલ જણાવી રહ્યા છે. તુર્કેઈના બાલીકેસિર પ્રાંત આવેલી એક વિસ્ફોટક સામગ્રી બનાવતી ફેક્ટરીમાં આ ભયાનક વિસ્ફોટ થયા હોવાની માહિતી પ્રાપ્ત થઈ રહી છે. પ્રાંતના ગર્વનર ઈસ્માઈલ ઉસ્તાઉગ્લુએ માહિતી આપતા જણાવ્યું કે, ‘બાલીકેસિર પ્રાંતના કારેસી વિસ્તારમાં આવેલી ફેક્ટરીમાં વિસ્ફોટ થયો છે, જેમાં 12 નાગરિકોના મોત થયા છે અને ચાર લોકો ઈજાગ્રસ્ત થયા છે.
સૂત્રોના જણાવ્યા અનુસાર જે ફેક્ટરીમાં વિસ્ફોટ થયો છે, તેનું નામ ZSR એમ્યુનિશન પ્રોડક્શન ફેક્ટરી છે. નોંધનિય બાબત છે હાલ સુધી વિસ્ફોટ થવાના કારણોની માહિતી પ્રાપ્ત થઈ રહી નથી. બીજીતરફ એવા અહેવાલ સામે આવ્યા છે કે, આ વિસ્ફોટ ભયાનક હતો, જેના કારણે મૃત્યુઆંક વધવાની સંભાવના છે. રિપોર્ટ મુજબ વિસ્ફોટ બાદ ફેક્ટરીની બિલ્ડિંગ ધરાશાઈ થઈ છે, જેમાં અનેક લોકોના મોત થયા છે. ઘટનાની જાણ થતાં જ પોલીસનો કાફલો અને ફાયર બ્રિગેડની ટીમો સ્થળ પર પહોંચી ગઈ છે અને પુરજોશમાં રાહત અને બચાવ કામગીરી શરૂ કરી દીધી છે. આ ઉપરાંત તપાસ એજન્સીઓએ ઘટનાના કારણોની પણ તપાસ શરૂ કરી દીધી છે. ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા છે.
