વડોદરા: શુક્રવારે વડોદરાની શ્રી નારાયણ વિ્દ્યાલયમાં એકાએક વર્ગખંડની બાજુના ભાગની લોબી તેમજ દિવાલનો ભાગ તૂટી પડ્યો હતો. આ સમગ્ર ઘટના CCTV માં કેદ થઈ છે, જેનો વીડિયો સામે આવ્યો છે. દિવાલ ધરાશાયી થતા 6 વિદ્યાર્થીઓ પટકાયા હતા, જેમાંથી 1 વિદ્યાર્થીને ઈજા થઈ હતી.
વાઘોડિયા-ડભોઇ રિંગ રોડ પર ગુરુકુળ નજીક આવેલી શ્રી નારાયણ સ્કૂલમાં એકાએક બાજુના ભાગની લોબી તેમજ દિવાલનો ભાગ તૂટી પડતા 1 વિદ્યાર્થીને ઈજા થઈ હતી. ધોરણ-7નો વર્ગ ચાલતો હતો. જો કે સદનસીબે કોઈ જાનહાનિ થઈ નથી. જો કે અહીં સૌથી મોટો પ્રશ્ન એ છે કે જો શાળાનું મકાન જર્જરિત હતું તો તે માટે કોઈ પગલાં કેમ લેવામાં આવ્યા ન હતા. ચિંતાની વાત એ હતી કે શાળા ચાલુ હતી તે દરમિયાન દીવાલ ધરાશાયી થઈ હતી. જો કે રીસેસ ટાઈમ પર આ ઘટના બની એટલા માટે મોટો અકસ્માત થતા બચી ગયો હતો. વીડિયોમાં જોઈ શકાય છે કે અચાનક ક્લાસરૂમનો એક સાઈડનો ભાગ ધરાશાયી થયો અને બાળકો નીચે પટકાયા હતા.
આ ઘટના બાદ પોલીસે ઘટના સ્થળે પહોંચી વધુ કાર્યવાહી હાથધરી હતી અને ફાયર વિભાગે પણ ઘટના સ્થળે જઈ કાટમાળ દૂર કરવાની કામગીરી કરી હતી.
