અમદાવાદ: સામાન્ય રીતે નવેમ્બરમાં રાજ્યભરની ઠંડીનો બરાબરનો માહોલ જામી ગયો હયો છે. ત્યારે આ વર્ષે નવેમ્બર મહિનો પૂર્ણ થઈ ગયો છે અને ડિસેમ્બર મહિનો શરૂ થઈ ગયો ત્યારે હજી શરૂ લોકો કડકડતીનો અનુભવ કર્યો નથી. શરૂઆતમાં થોડા દિવસ ઠંડીનું જોર વધ્યા બાદ ફરી તાપમાન વધતાં ઠંડીમાં ‘ઠંડી’ પડી ગઈ. રાજ્યમાં ગત ચોવીસ કલાક દરમિયાન મોટા ભાગનાં શહેરોમાં તાપમાનનો પારો ઊંચકાતાં ઠંડીમાં રાહત રહી હતી. એકમાત્ર નલિયામાં જ તાપમાન ઘટ્યું હતું, જ્યાં સૌથી ઓછું 11.5 ડિગ્રી નોંધાયું હતું. આ વચ્ચે આજે વલસાડ સહિત દક્ષિણ ગુજરાતના કેટલાક વિસ્તારોમાં કમોસમી વરસાદ વરસ્યો છે.
હવામાન વિભાગની આગાહી અનુસાર, આગામી 20 ડિસેમ્બર બાદ ગુજરાતમાં ઠંડીની જમાવટ થશે. વલસાડ જિલ્લાના કેટલાક આંતરિયાળ વિસ્તારોમાં કમોસમી વરસાદ પડતાં ભરશિયાળે ચોમાસા જેવો માહોલ સર્જાયો છે. શિયાળાની સિઝનમાં વરસાદ પડતા વલસાડ જિલ્લાના ખેડૂતોમાં ચિંતાનું મોજું ફરી વળ્યું છે. કારણ કે માવઠાના લીધે શિયાળુ પાકને નુકસાન પહોંચવાની ભીતિ છે.
ગુજરાત રાજ્યનાં ચાર મહાનગરમાં છેલ્લા 24 કલાક દરમિયાન ઠંડીનું જોર ઓછું રહ્યું હતું, જેમાં અમદાવાદ શહેરનું લઘુતમ તાપમાન છેલ્લા 24 કલાક દરમિયાન 19 ડિગ્રી સેલ્સિયસ વડોદરામાં 19.2 ડિગ્રી સેલ્સિયસ રાજકોટમાં 16.8 ડિગ્રી સેલ્સિયસ અને સુરતમાં 23 ડિગ્રી સેલ્સિયસ લઘુતમ તાપમાન નોંધાયુ હતું. હવામાન વિભાગ પ્રમાણે ગુજરાતભરમાં હાલમાં લઘુત્તમ તાપમાનમાં વધારો નોંધાયો છે, પરંતુ આગામી સાત દિવસ ગુજરાત રાજ્યનું વાતાવરણ સાથે આગામી ત્રણ દિવસ લઘુત્તમ તાપમાનમાં બેથી ચાર ડિગ્રી સેલ્સનો ઘટાડો નોંધાય શકે છે, જેથી ફરી એક વખત ઠંડીનું જોર વધવાની શક્યતાઓ છે. હાલમાં ગુજરાતના કેટલાક ભાગો ઉપર છુટા છવાયા વરસાદની પણ શક્યા છે.
