ગુજરાતભરમાં ધામધૂમથી દિવાળીની ઉજવણી કરવામાં આવી હતી. લોકોએ મનમૂકી ફટાકડાની મોજ મસ્તી માણી હતી. પરંતુ વધુ પ્રમાણમાં ફટાકડાથી ગુજરાતના મહાનગરોમાં આગ બનાવોમાં પણ મોટા પ્રમાણમાં વધારો નોંધાયો છે. જેમાં અમદાવાદ, સુરત, રાજકોટ, વડોદરા સહિત રાજ્યભરના શહેરોમાં આગ લાગવાની ઘટના બની છે. જોકે સારી બાબત એ રહી કે આગની ઘટનામાં કોઈ જાનહાની સર્જાઈ નથી. જેના કારણે તંત્રએ રાહતનો શ્વાસ લીધો છે. ઉલ્લેખનીય છે કે રાજ્યભરમાંથી 4,885 ઈમરજન્સીના કોલ નોંધાયા છે.
અમદાવાદમાં દિવાળીના પર્વ દરમિયાન આગ લાગવાના 80 થી વધુ બનાવો બનતા ફાયર બ્રિગેડને સતત કામગીરી ચાલુ રાખવી પડી હતી. જેના લીધે દિવાળી દરમિયાન ફાયરબ્રિગેડે સતત દોડતા રહેવું પડ્યું હતું. મોટાભાગના આગના બનાવો ફટાકડા ને કારણે લાગ્યા હોવાનું મનાય છે. જેમાં દુકાન, મકાન, શોર્ટ સર્કિટ, સ્કૂલ, ગોડાઉન, ભંગાર, વાહન વગેરેમાં આગ લાગવાના બનાવનો સમાવેશ થાય છે. જેમાં સૌથી વધુ કચરાના કોલ મળ્યા હતા. અમદાવાદમાં 80, સુરતમાં 90, જ્યારે વડોદરામાં 21 આગના 21 કોલ મળ્યા હતા. દિવાળીની રાત્રે અમદાવાદ શહેરમાં આગની કુલ 80 જેટલી નાની મોટી ઘટના બનવા પામી હતી. અમદાવાદના મિરઝાપુરમાં કબાડી માર્કેટમાં સૌથી મોટી આગ લાગી હતી. જેને કાબુમાં લેવા માટે 12 ગજરાજ અને ફાયરના અધિકારીઓ કામગીરીમાં જોડાયા હતા. 8 જેટલી દુકાનો સદંતર બળી ને રાખ થઇ ગઈ હતી.
બીજી બાજુ સુરતના વિવિધ વિસ્તારોમાંથી ફાયર બ્રિગેડની ટીમને 90થી વધુ આગના કોલ મળ્યા હતા. કાપોદ્રા, સરથાણા અને પુણાગામ સહિતના ફાયર સ્ટેશનથી ફાયર બ્રિગેડના જવાનો ઘટનાસ્થળે પહોંચી ગયા હતા અને આગ પર કાબૂ મેળવ્યો હતો. આગના 90 જેટલા કોલના પગલે ફાયર વિભાગ સતત દોડતું રહ્યું હતું. જામનગર શહેર અને આસપાસના વિસ્તારમાં દિવાળીની રાત્રે 27 સ્થળે આગજનીની ઘટના નોંધાઇ હતી. 70 જેટલા ફાયર સ્ટાફની મદદથી તમામ સ્થળોએ આગ પર કાબુ મેળવી લેવાયો હતો, અને સદભાગ્યે કોઈ જાનહાની થઈ ન હતી. જામનગર શહેરમાં સેકશન પર એક રહેણાંક મકાનના આગ લાગી હતી. સળગતો ફટાકડો પડવાના કારણે મકાનમાં આગ લાગ્યા પછી આગની જવાળાઓ દૂર સુધી દેખાઈ હતી, અને શરુ સેક્શન મેઇન રોડ વિસ્તારમાં અફડા તફડીનો માહોલ સર્જાયો હતો.
