અમદાવાદ: ઉત્તર ગુજરાતમાં તીડના આતંક સામે હજુ માંડ ખેડૂતોએ રાહતનો શ્વાસ લીધો છે ત્યાં તો ફરી કચ્છના નડાબેટમાં આવેલી ભારત-પાકિસ્તાન બોર્ડર પર તીડનું ઝુંડ દેખાયું છે. ગુજરાતના સરહદી વિસ્તારોમાં ફરીથી તીડનું આક્રમણ થાય તેવી શક્યતા છે. બોર્ડર પરથી લાખોની સંખ્યામાં તીડનું ઝુંડ આવતું જોવા મળ્યું છે. કેન્દ્ર સરકાર દ્વારા તાત્કાલિક અસરથી નડાબેડ ખાતે 2 ટિમ ગોઠવી દેવામાં આવી છે.
આ તીડ બોર્ડરની ફેન્સિંગ પર બેસેલા પણ જોવા મળ્યા છે. જોકે પવનની દિશા પરથી નક્કી થશે કે તીડ ક્યાં જશે. અગાઉ પણ પવનની દિશા મુજબ જ તીડ અલગ અલગ ઝુંડમાં ઉત્તર ગુજરાતના પાટણ, બનાસકાંઠા, સાબરકાંઠા અને છેક મહેસાણા સુધી આવી પહોંચ્યા હતા.
અગાઉ 3 જાન્યુઆરીએ અબડાસાના સાંઘી દરિયા કાંઠે મોટી સંખ્યામાં તીડના ઝૂંડ આવી ચડ્યાં હતા. તીડને કારણે વાહનચાલકોને મુશ્કેલીનો સામનો કરવો પડ્યો હતો. મહત્વનું છે કે, હમણાં થોડા સમય પહેલાં જ સરકારે ઉત્તર ગુજરાતમાં આવી ચડેલા તીડના ટોળાંને કાબૂમાં લીધા હતા. ત્યારે ફરી એક વાર ગુજરાતના કચ્છમાં તીડના ઝૂંડે આક્રમણ થવાની શક્યતાથી ખાસ કરીને ખેડૂતોમાં દહેશત જોવા મળી રહી છે.
બનાસકાંઠા જિલ્લાના 13 તાલુકાના 114 ગામો, મહેસાણા જિલ્લાના 1 તાલુકાના 5 ગામો, પાટણ જિલ્લાના 2 તાલુકાના 4 ગામો, સાબરકાંઠા જિલ્લાના 1 તાલુકાના 1 ગામ મળી કુલ 4 જિલ્લાના 17 તાલુકાના 124 ગામોમાં તીડની હાજરી જોવા મળી હતી. જેથી લોકેશન ટ્રેક કરી આ તમામ વિસ્તારોમાં તીડ નિયંત્રણની કામગીરી યુદ્ધના ધોરણે હાથ ધરાઇ હતી.
તીડથી માત્ર ભારત જ નહીં પણ વિશ્વના 65 દેશ પરેશાન છે. 35 દિવસનું આયુષ્ય ધરાવતી તીડ તેના શરીરના પ્રમાણમાં અનેક ગણો ખોરાક ખાય છે. તીડના કારણે ખેતીના પાકને મોટાપાયે નુકસાન થતું હોવાથી ખેડૂતો તીડને ભગાડવા માટે નવી નવી તરકીબો અજમાવી રહ્યા છે.
