સુરત: કઝાકિસ્તાન ખાતે સીએમસી એશિયન ગ્લોબલ વર્લ્ડ કપ ચેમ્પિયનશિપમાં હેરસ્ટાઇલિંગ કોમ્પિટિશનમાં સુરતના ઘનશ્યામ ગઢાદરાએ ફર્સ્ટ રેન્ક મેળવી ભારતની યશકલગીમાં વધારો કર્યો છે. આ ચેમ્પિયનશિપમાં કઝાકિસ્તાન, યુકે, ચીન સહિતના 10 દેશના હેરસ્ટાઈલિસ્ટોએ ભાગ લીધો હતો. ઉલ્લેખનીય છે કે ઘનશ્યામે 30 મિનિટમાં બનાવેલી હેરસ્ટાઇલ પર જજ પણ મોહિત થઈ ગયા હતા.
આપને જણાવી દઈએ કે ગત મહિને કઝાકિસ્તાનમાં CMC એશિયન ગ્લોબલ વર્લ્ડ ચેમ્પિયનશિપ યોજાઈ હતી. આ પ્રતિયોગીતામાં 10 દેશ વચ્ચે ઇન્ટરનેશનલ કોમ્પિટિશન થઈ હતી. જેમાં વર્લ્ડ ચેમ્પિયન આર્ટિસ્ટે ભાગ લીધો હતો. આ વર્લ્ડ ચેમ્પિયનશિપમાં હેરસ્ટાઇલિંગ કોમ્પિટિશન હતી, જેમાં ભારત અને ગુજરાતના 15 જેટલા હેરસ્ટાઈલિસ્ટે ભાગ લીધો હતો, જે પૈકી સુરતના ઘનશ્યામ ગઢાદરાએ ફર્સ્ટ રેન્ક મેળવ્યો હતો. હેરસ્ટાઇલિંગ કોમ્પિટિશનમાં ફર્સ્ટ રેન્ક મેળવનાર ઘનશ્યામ ગઢાદરાએ સુરતનું અને દેશનું નામ રોશન કર્યું હતું. અત્રે ઉલ્લેખનીય છે કે ઘનશ્યામ પાછલ 10 વર્ષથી આ ફિલ્ડમાં કાર્યરત છે. જ્યારે આ પ્રતિયોગીતા માટે ઘનશ્યામે 72 કલાક સતત પ્રેક્ટિસ પણ કરી હતી. જ્યારે 72 કલાકની મહેનત વર્લ્ડ સામે રાખતા ઘનશ્યામને 30 મિનિટ જેટલો સમય લાગ્યો હતો.
