ગુજરાતમાં હાલ ઠંડીમાંથી આંશિક રાહત મળી છે. ત્યારે હવામાન વિભાગે ઠંડીનો વધુ એક રાઉન્ડ શરૂ થવાની આગાહી વ્યક્ત કરી છે. પૂર્વથી ઉત્તર પૂર્વના પવન ફૂંકાતા ઠંડીમાં વધારો નોંધાયો છે. ઉલ્લેખનીય છે કે ગત રોજ રાજયના મોટા ભાગના શહેરોના તાપમાનમાં ઘટાડો નોંધાયો છે. જ્યારે નલિયામાં સૌથી ઓછું તાપમાન 7.2 ડિગ્રી નોંધાયું છે. મહત્વનું છે કે,રાજસ્થાનમાં સાયક્લોનિક સર્ક્યુલેશન સક્રિય થયું છે અને સર્ક્યુલેશનથી વાદળછાયું વાતાવરણ રહી શકે છે. આ ઉપરાંત મોટાભાગના શહેરોના તાપમાનમાં ઘટાડો નોંધાયો છે.
પ્રાપ્ત માહિતી પ્રમાણે ગઈકાલે અમદાવાદમાં 15.7 ડિગ્રી, ગાંધીનગરમાં 13.5 ડિગ્રી,ડીસા 14.1 ડિગ્રી,વલ્લભ વિદ્યાનગર 15.4 ડિગ્રી,વડોદરા 15.8 ડિગ્રી, સુરત 17.0 ડિગ્રી,ભુજ 12.6 ડિગ્રી ,કંડલા 12.6 ડિગ્રી,અમરેલી 15.2 ડિગ્રી, ભાવનગર 15.6 ડિગ્રી,દ્વારકા 16.3 ડિગ્રી,ઓખા 19.8 ડિગ્રી,પોરબંદર 14.3 ડિગ્રી,વેરાવળ 16.8 ડિગ્રી,રાજકોટ 11.2 ડિગ્રી,સુરેન્દ્રનગર 14.0 ડિગ્રી,મહુવા 14.9 ડિગ્રી , કેશોદ 11.8 ડિગ્રી તાપમાન નોંધાયું છે. હાલ ગુજરાત પરથી વેસ્ટન ડિસ્ટર્બન્સ પસાર થઈ રહ્યું છે જેના કારણે તેજ ગતિએ પવન ફૂંકાય રહ્યા છે. આવતીકાલ સુધી રાજયમાં વેસ્ટન ડિસ્ટર્બન્સની અસર રહેશે જેના કારણે ગુજરાતભરમાં ઠંડીનો માહોલ સાથે પવન 15 થી 20 કિમીની ઝડપે ફૂંકાશે. આ ઉપરાંત લઘુતમ તાપમાનમાં 2 થી 3 ડિગ્રીનો ઘટાડો જોવા મળ્યો છે.
હવામાન વિભાગની આગાહી પ્રમાણે બે દિવસ બાદ ઠંડીનો નવો રાઉન્ડ શરૂ થવાની શક્યતા છે. જેને પગલે ઠંડીનો પારો 13 ડિગ્રી સુધી ગગડવાની આગાહી કરવામાં આવી છે. બંગાળની ખાડી તરફથી આવતા ભેજવાળા પવન અને વેસ્ટર્ન ડિસ્ટર્બન્સને કારણે રાજ્યના અનેક વિસ્તારોમાં વાદળછાયું વાતાવરણ છવાયું છે. ત્યારે હવામાન વિભાગે ગુરુવારથી ત્રણ દિવસ ગુજરાતનાં અનેક જિલ્લાઓમાં ગાજવીજ સાથે વરસાદ અને કરા પડવાની પણ આગાહી આપી છે.
