અમદાવાદઃ ગુજરાતમાં વિધાનસભાની ૮ બેઠકોની આવતી ૩ નવેમ્બરે નિર્ધારિત પેટા-ચૂંટણીમાંથી સાત બેઠકો માટે શાસક ભારતીય જનતા પાર્ટીએ ઉમેદવારોના નામની આજે જાહેરાત કરી છે.
આ ઉમેદવારો છેઃ પ્રદ્યુમન સિંહ જાડેજા (અબડાસા), બ્રિજેશ મેરજા (મોરબી), જે.વી. કાકડિયા (ધારી), આત્મારામ પરમાર (ગઢડા), અક્ષય પટેલ (કરજણ), વિજય પટેલ (ડાંગ) અને જીતુ ચૌધરી (કપરાડા).
સુરેન્દ્રનગર જિલ્લાની લીંબડી બેઠક માટે ઉમેદવારની પસંદગી હજી બાકી છે.
૮ વિધાનસભ્યોએ રાજીનામા આપ્યા હોવાથી આ તમામ બેઠકો પર પેટા-ચૂંટણી યોજાઈ રહી છે.
પેટા-ચૂંટણી માટે ૯ ઓક્ટોબરથી ઉમેદવારી માટે ફોર્મ ભરી શકાશે. ૧૬ ઓક્ટોબર ફોર્મ ભરવાની છેલ્લી તારીખ છે. તો ૧૯ ઓક્ટોબર ફોર્મ ખેંચવાની છેલ્લી તારીખ છે. ૩ નવેમ્બરે મતદાન થશે અને ૧૦ નવેમ્બરે પરિણામ જાહેર થશે.
