અમદાવાદ: શહેરમાં વધતા નબિરા અને અસામજીક તત્વો આતંક સામે તંત્ર સજ્જડ બની ગયું છે. દિવસ રાત એક કરી એક એક નબીરાને ગોતી સજા આપી રહ્યા છે. અમદાવાદમાં 23મી નવેમ્બરે એસ. જી. હાઈવે પર હાઈકોર્ટ ઓવર બ્રિજ પર હિટ એન્ડ રનની ઘટના બની હતી. જેમાં એક એસયુવી કાર ચાલક બે સાઇકલ સવારને ટક્કર મારીને ભાગી ગયો હતો. ટક્કર બાદ સાઇકલ પર સવાર બંને લોકો દૂર સુધી ફંગોળાયા હતાં. આ ઘટનામાં એક ડોક્ટર અને એક મહિલા ઈજાગ્રસ્ત થયા હતા. આ મામલે પોલીસે આખરે એસયુવી ચાલક પરમ ઉદય વોરાની ધરપકડ કરી લીધી છે.
23મી નવેમ્બરે વહેલી સવારે હાઇકોર્ટ બ્રિજ પર હિટ એન્ડ રનની આ ઘટના બની હતી. વહેલી સવારે કેટલાક તબીબો મિત્રો સાથે સાઈકલિંગ કરી બ્રિજ પરથી સવાર થઈ રહ્યા હતાં. આ દરમિયાન એકાએક પાછળથી કાળા રંગની એસયુવી આવી અને સાઇકલ ચાલક ડો. અનિસ તિવારી અને ક્રિષ્ના શુક્લાને ટક્કર મારી ત્યાંથી ફરાર થઈ ગઈ હતો. પોલીસ સીસીટીવીના આધારે કાળા રંગની એસયુવી ચાલક પરમ ઉદય વોરાને ઝડપી લીધો છે. ઈજાગ્રસ્ત તબીબ સહિતના મિત્રો સવારે કસરત કરવાના હેતુથી સાઇકલિંગ કરી રહ્યા હતા. આ દરમિયાન એક બેફામ કારે બે લોકોને ટક્કર મારી હતી. સમગ્ર ઘટનાની જાણ થતાં આસપાસના લોકો ત્યાં મદદે પહોંચી ગયાં હતાં. સ્થાનિકોએ તાત્કાલિક 108 અને પોલીસને જાણ કરી હતી.
