મુંબઈઃ બોલીવુડ અભિનેતા સોનૂ સૂદ આજે તેનો 50મો જન્મદિવસ ઉજવી રહ્યો છે. તેના પ્રશંસકોએ સોનૂના જન્મદિન નિમિત્તે ગઈ કાલે આખા દેશમાં રક્તદાન શિબિરનું આયોજન કર્યું હતું.
એક નિવેદનમાં જણાવવામાં આવ્યું છે કે, મુસીબતમાં ફસાયેલાં લોકોને મદદરૂપ થવાની સોનૂ સૂદની નિષ્ઠામાંથી પ્રેરણા લઈને અને તેને એક ટ્રિબ્યૂટ આપવા તેના પ્રશંસકોએ એના જન્મદિવસ નિમિત્તે વિશાળ પાયે રક્તદાન શિબિર યોજી છે. આખા દેશમાં 800-900 રક્તદાન શિબિરોનું આયોજન કરવામાં આવ્યું છે.
સોનૂ સૂદ હાલ રોડિઝ નામક એક રિયાલિટી શો કરી રહ્યો છે. તે ઉપરાંત એક્શન થ્રિલર ફિલ્મ ફતેહના શૂટિંગમાં પણ એ વ્યસ્ત છે. વૈભવ મિશ્રા દિગ્દર્શિત આ ફિલ્મમાં તેની સાથે જેક્લીન ફર્નાન્ડિસ મુખ્ય ભૂમિકામાં છે.
