મુંબઈઃ પાકિસ્તાનમાં જન્મેલાં બ્રિટિશ અભિનેત્રી સલમા આગાની દીકરી ઝારા ખાન પર બળાત્કાર કરવાની ઈન્સ્ટાગ્રામ પર ધમકી મળ્યા બાદ એમણે પોલીસમાં ફરિયાદ કરી હતી. ઓશિવરા (જોગેશ્વરી) પોલીસે આ મામલે બે જણને અટકમાં લીધા છે. એમાં 23 વર્ષની એક યુવતી છે. માહિતી અનુસાર, આરોપી નૂરા યુવતી હૈદરાબાદની છે. તે એમબીએનું ભણે છે. ઈન્સ્ટાગ્રામ પર એણે પોતાનો નકલી પ્રોફાઈલ બનાવ્યો છે.
નૂરા અને તેનો સાથી કોઈક રાજકીય પક્ષ માટે કામ કરે છે. એ બંનેએ ઝારા ખાનને ધમકી આપી હતી. ઝારાએ પોલીસમાં ફરિયાદ નોંધાવ્યા બાદ સાઈબર સેલને તપાસ સોંપવામાં આવી હતી. પોલીસો આઈપી એડ્રેસના માધ્યમથી આરોપીઓ સુધી પહોંચ્યા હતા.
ઝારા ખાન બોલીવૂડમાં નસીબ અજમાવી રહી છે. એણે અર્જૂન કપૂર સાથે ઔરંગઝેબ ફિલ્મમાં કામ કરીને બોલીવૂડમાં પદાર્પણ કર્યું હતું. ત્યારબાદ એ દેશી કટ્ટા ફિલ્મમાં પણ જોવા મળી હતી. પાકિસ્તાની મૂળની સલમા આગાનો જન્મ લંડનમાં થયો હતો. તરૂણાવસ્થામાં એ બોલીવૂડમાં નસીબ અજમાવવા ભારત આવી હતી. બી.આર. ચોપરા દિગ્દર્શિત નિકાહ સાથે એમણે બોલીવૂડમાં એન્ટ્રી કરી હતી. દેખાવે સુંદર ઉપરાંત સલમા આગા ગાયિકા તરીકે પણ જાણીતાં થયાં છે.
