મુંબઈઃ ફિલ્મ અભિનેત્રી અને રામપુરનાં ભૂતપૂર્વ સાંસદ જયાપ્રદાને ચેન્નાઈની કોર્ટે છ મહિનાની જેલની સજા ફટકારી છે. ચેન્નાઈના રાયપેટામાં તેમની માલિકીના મૂવી થિયેટરના કર્મચારીઓ દ્વારા દાખલ કરવામાં આવેલી અરજીના સંબંધમાં તેમને કેસમાં સજા ઉપરાંત રૂ. 5000નો દંડ પણ ફટકારવામાં આવ્યો છે. ફિલ્મઅભિનેત્રી અને ભૂતપૂર્વ સાંસદ જયાપ્રધાનની વિરુદ્ધ મુરાદાબાદની સ્પેશિયલ MP MLA કોર્ટે 17 ઓગસ્ટે બિનજામીન વારંટ જારી કર્યું હતું.
ચેન્નાઈના આ સિનેમા હોલનું સંચાલન રામ કુમાર અને રાજા બાબુ કરે છે. આ ઘટનામાં સમસ્યા ત્યારે શરૂ થઈ જ્યારે મેનેજમેન્ટ થિયેટર કામદારોને ESI ચૂકવવામાં નિષ્ફળ ગયું અને તેમણે કોર્ટનાં દ્વાર ખટખટાવ્યાં હતાં. બાદમાં, અભિનેત્રીએ સ્ટાફને સંપૂર્ણ રકમ ચૂકવવાનું વચન આપ્યું હતું અને કોર્ટમાં કેસને રદ કરવાની અપીલ કરી હતી.જયાપ્રદા સહિત આરોપીઓને આ કેસમાં કોર્ટ દ્વારા સજા ફટકારવામાં આવી હતી જોકે શ્રમ સરકારી વીમા નિગમના વકીલે તેમની અપીલ સામે વાંધો ઉઠાવ્યો હતો. ત્યાર દ જયાપ્રદા અને આ કેસ સાથે જોડાયેલા અન્ય ત્રણને છ મહિનાની જેલની સજા ફટકારવામાં આવી હતી. એ સાથે દરેકને રૂ. 5000 રૂપિયાનો દંડ પણ ફટકારવામાં આવ્યો હતો.
રામપુરથી સાંસદ રહી ચૂકેલાં જયાપ્રદાની રાજકીય કારકિર્દી 1994માં તેલુગુ દેશમ પાર્ટીથી શરૂ થઈ હતી. જયા પ્રદા આંધ્ર પ્રદેશમાંથી 1996માં પ્રથમ વખત રાજ્યસભામાં ચૂંટાયાં હતાં. ત્યાર પછી 2004માં તે સમાજવાદી પાર્ટીમાં જોડાઈ ગયાં હતાં અને બે વાર લોકસભા સાંસદ પણ બન્યાં હતાં. તેઓ રાષ્ટ્રીય લોકદળ તરફથી લોકસભાની ચૂંટણી પણ લડ્યાં હતાં. ત્યારબાદ ભારતીય જનતા પાર્ટીમાં જોડાયાં હતાં.
