દિલ્હી કોર્ટે ફરી એકવાર દિલ્હીના મુખ્યમંત્રી અરવિંદ કેજરીવાલને આંચકો આપ્યો છે. કોર્ટે એ અરજીને ફગાવી દીધી છે જેમાં કેજરીવાલે જેલ સત્તાવાળાઓને સુગર લેવલમાં વધારો અને ઘટાડાને લઈને દરરોજ 15 મિનિટ સુધી વીડિયો કોન્ફરન્સિંગ દ્વારા ઈન્સ્યુલિન આપવા અને ડૉક્ટર સાથે સલાહ લેવાની પરવાનગી માંગી હતી. વિશેષ ન્યાયાધીશ કાવેરી બાવેજાએ નિર્દેશ આપ્યો કે અરવિંદ કેજરીવાલને યોગ્ય તબીબી સારવાર પૂરી પાડવામાં આવે. જો કેજરીવાલને કોઈ વિશેષ પરામર્શની જરૂર હોય, તો જેલ સત્તાવાળાઓ એઈમ્સના ડિરેક્ટર દ્વારા રચાયેલ મેડિકલ બોર્ડની નિમણૂક કરશે, જેમાં એન્ડોક્રિનોલોજિસ્ટ અને ડાયાબિટોલોજીસ્ટનો સમાવેશ થશે.
ઇન્સ્યુલિન અંગે મેડિકલ બોર્ડ નિર્ણય લેશે
તેમણે કહ્યું કે મેડિકલ બોર્ડે નક્કી કરવાનું છે કે દિલ્હીના સીએમ અરવિંદ કેજરીવાલને ઈન્સ્યુલિન આપવું જોઈએ કે નહીં. કોર્ટે કહ્યું કે મેડિકલ બોર્ડ નિર્ધારિત આહાર અને કસરતની યોજના પણ નક્કી કરશે, જેનું નિયમિતપણે પાલન કરવું જોઈએ. મેડિકલ બોર્ડ દ્વારા નિર્ધારિત આહાર યોજનામાં કોઈ ફેરફાર કરવામાં આવશે નહીં.
કોર્ટે 19 એપ્રિલે પોતાનો નિર્ણય સુરક્ષિત રાખ્યો હતો
તમને જણાવી દઈએ કે, સીએમ કેજરીવાલે દરરોજ 15 મિનિટ માટે વીસી દ્વારા ઇન્સ્યુલિન ડિલિવરી અને મેડિકલ કન્સલ્ટેશનની માંગ કરતી અરજી દાખલ કરી હતી. 19 એપ્રિલ (શુક્રવાર)ના રોજ સુનાવણી હાથ ધરવામાં આવી હતી અને વિશેષ ન્યાયાધીશે સોમવાર સુધી નિર્ણય સુરક્ષિત રાખ્યો હતો. કેજરીવાલના વકીલે કહ્યું હતું કે કેજરીવાલ 22 વર્ષથી ડાયાબિટીસથી પીડિત છે અને તેમને દરરોજ ઇન્સ્યુલિનની જરૂર પડે છે. જ્યારે EDએ કહ્યું કે કેજરીવાલે ઘણા સમય પહેલા ઇન્સ્યુલિન લેવાનું બંધ કરી દીધું હતું.
