ચેન્નાઈઃ કેન્દ્રીય નાણાં પ્રધાન નિર્મલા સીતારામન ગઈ કાલે ચેન્નાઈ શહેરની એક-દિવસની મુલાકાતે ગયાં હતાં. એ દરમિયાન એમણે એક બજારમાં જઈને શાકભાજી ખરીદ્યાં હતાં. એનો વીડિયો ઈન્ટરનેટ પર વાઈરલ થયો છે અને નેટયૂઝર્સ તરફથી આ વિશે મિશ્ર પ્રત્યાઘાતો આવ્યાં છે. વીડિયોમાં સીતારામન બટેટાં ખરીદતાં દેખાય છે અને શાકભાજી વેચનારાઓ સાથે વાતચીત પણ કરે છે.
કેટલાંક નેટયૂઝર્સે સીતારામનની પ્રશંસા કરી છે તો કેટલાંકે ટીકા. ઉલ્લેખનીય છે કે હાલ દેશમાં મોંઘવારી હદ વટાવી ગઈ છે. શાકભાજી અત્યંત મોંઘાં થઈ ગયાં છે.
