મુંબઈ: 1996માં રિલીઝ થયેલી બ્લોકબસ્ટર ફિલ્મ’રાજા હિન્દુસ્તાની’ માટે પહેલી પસંદ કરિશ્મા કપૂર નહીં પણ ઐશ્વર્યા રાય બચ્ચન હતી. પરંતુ આ ફિલ્મ ના કરતા ઐશ્વર્યાએ કદાચ એટલી દુઃખી ન હોય, પરંતુ ફિલ્મના નિર્માતાઓને ઘણું દુઃખ થયું હતું. ખુલાસો કરતી વખતે અભિનેત્રીએ જણાવ્યું હતું કે તેણે શા માટે આ ફિલ્મનો ઇનકાર કર્યો હતો, ત્યારબાદ નિર્માતાઓએ કરિશ્મા કપૂરને ફિલ્મમાં કાસ્ટ કરી હતી. ઐશ્વર્યા રાયે તેની એક્ટિંગ કરિયરની શરૂઆત વર્ષ 1997માં તમિલ ફિલ્મ ‘ઈરુવર’થી કરી હતી. તે જ વર્ષે તેણે ‘ઔર પ્યાર હો ગયા’થી બોલિવૂડમાં ડેબ્યૂ કર્યું હતું. જો ઐશ્વર્યા રાયે એક વર્ષ પહેલા આમિર ખાનની ફિલ્મ માટે હા પાડી હોત તો તેણે 1996માં જ બોલિવૂડમાં એન્ટ્રી કરીને ધૂમ મચાવી દીધી હોત.
ઐશ્વર્યા રાયના અસ્વીકાર પછી ફિલ્મ નિર્માતાઓએ કરિશ્મા કપૂરને તક આપી અને આ ફિલ્મે કપૂર પરિવારની પુત્રીને હિન્દી સિનેમાની સુપરસ્ટાર બનાવી. ઐશ્વર્યા રાયને ‘રાજા હિન્દુસ્તાની’ ઓફર કરવામાં આવી હતી. વોગને આપેલા એક ઈન્ટરવ્યુમાં ભારતની મિસ વર્લ્ડે કહ્યું હતું કે,’મને ઘણીવાર કહેવામાં આવે છે કે મિસ વર્લ્ડ બન્યા બાદ મારી કરિયરનો વિકાસ થયો છે, પરંતુ એવું નથી આ પહેલા પણ મને ફિલ્મોની ઑફર્સ મળી હતી. મારી પાસે ઓછામાં ઓછી ચાર ફિલ્મોની ઓફર હતી. વાસ્તવમાં, મેં મિસ ઈન્ડિયામાં ભાગ લેવાનું નક્કી કર્યું અને થોડા સમય માટે ફિલ્મ ઈન્ડસ્ટ્રીમાંથી એક પગલું પાછું ખેંચ્યું. જો મેં મિસ ઈન્ડિયામાં ભાગ ન લીધો હોત તો રાજા હિન્દુસ્તાની (1996) મારી પહેલી ફિલ્મ હોત.’
રૂ. 5.75 કરોડના બજેટમાં બનેલી આ ફિલ્મે વિશ્વભરમાં રૂ. 76.34 કરોડની કમાણી કરી અને 1996ની સૌથી વધુ કમાણી કરનારી ફિલ્મ બની. ‘હમ આપકે હૈ કૌન’, ‘દિલવાલે દુલ્હનિયા લે જાયેંગે’ અને ‘કુછ કુછ હોતા હૈ’ પછી આ ફિલ્મ 1990ના દાયકામાં ભારતમાં ચોથી સૌથી વધુ કમાણી કરનારી ફિલ્મ બની હતી. આ ફિલ્મમાં આમિર ખાન સાથે કરિશ્મા કપૂર લીડ રોલમાં જોવા મળી હતી અને આ ફિલ્મ બંનેના કરિયર માટે ઘણી સારી સાબિત થઈ હતી.
