રાજ્ય શિક્ષણ વિભાગમાં માધ્યમિક અને ઉચ્ચતર માધ્યમિક બોર્ડનું નવા વર્ષનું શૈક્ષણિક કેલેન્ડર જાહેર કરવામાં આવ્યુ છે. બોર્ડ દ્વારા આગામી શૈક્ષણિક વર્ષ એટલે કે વર્ષ 2023-2024નું કેલેન્ડર જાહેર કરી દેવામાં આવ્યું છે. જેમાં દિવાળી રજા અને પરીક્ષાની તારીખો પણ જાહેર કરી દેવામાં આવી છે. દરવખતની જેમ આ વખતે પણ દિવાળી વેકેશન 21 દિવસનું રહેશે. આ ઉપરાંત શૈક્ષણિક વર્ષ 2023-24 માટે શાળાકીય પ્રવૃત્તિ કેલેન્ડરની વિગતો જાહેર કરવામાં આવી છે. જેમાં શૈક્ષણિક સત્ર અને વેકેશનની વિગતો, શાળાકીય પરીક્ષાની તારીખની વિગતો, પરીક્ષાઓ અંગેની સૂચનાઓ, જાહેર રજાઓની વિગતો તેમજ ધોરણ-10 અને 12ની બોર્ડની પરીક્ષાઓની તારીખની વિગતો સામેલ કરવામાં આવી છે.
બોર્ડની પરીક્ષા 11 માર્ચથી શરૂ થશે
મળતી માહિતી મુજબ ગુજરાત બોર્ડનું નવું શિક્ષણ સત્ર 5 જૂનથી શરૂ થશે અને 8 નવેમ્બર સુધી પ્રશમ સત્ર રહેશે. એટલે કે પ્રથમ સત્રમાં 124 દિવસનો અભ્યાસ કરવાનો રહેશે. ત્યારબાદ 21 દિવસનું દીવાળી વેકેશન 9 નવેમ્બરથી શરૂ થશે. ત્યારબાદ 30 નવેમ્બરથી બીજા સત્રનો પ્રારંભ થશે. નવા શૈક્ષણિક વર્ષમાં વિદ્યાર્થીઓને કુલ 80 દિવસની રજાઓ મળશે. આ ઉપરાંત ધોરણ 10 અને 12ની બોર્ડની પરીક્ષા 11 માર્ચથી શરૂ થશે. જ્યારે 28 માર્ચે પૂર્ણ થશે. ધોરણ 12 સાયન્સની પ્રાયોગિક પરીક્ષા 19 ફેબ્રુઆરીથી શરૂ થશે. તો પ્રથમ સત્રની પરીક્ષા 3 ઓક્ટોબરથી લેવાશે.
