ઈન્ડિયન પ્રીમિયર લીગ (IPL)ની 16મી સિઝન આ વર્ષે 22 માર્ચથી યોજાશે. જ્યારે વુમન્સ પ્રીમિયર લીગ (WPL)ની બીજી સિઝન ફેબ્રુઆરીના અંતથી શરૂ થશે. સૂત્રોના જણાવ્યા અનુસાર આ વર્ષે સામાન્ય ચૂંટણીઓ યોજાવાની છે અને તેને ધ્યાનમાં રાખીને IPLનું આયોજન કરવામાં આવશે. ચૂંટણી છતાં 2019ની જેમ તમામ મેચ ભારતમાં જ યોજાશે.
બીસીસીઆઈએ પ્લાન તૈયાર કર્યો
સૂત્રોના જણાવ્યા અનુસાર IPL હોસ્ટિંગ શહેરોમાં જ્યારે લોકસભા ચૂંટણી યોજાશે તે તબક્કા દરમિયાન ત્યાંની મેચો અન્ય સ્થળોએ યોજાશે. આગામી તબક્કાની ચૂંટણી જ્યાં યોજાશે તે સ્થળોની મેચો અન્ય સ્થળોએ યોજવામાં આવશે. BCCI આ રીતે મેચોનું આયોજન કરવાની યોજના બનાવી રહ્યું છે.
ચૂંટણી દરમિયાન મેચો માટે સુરક્ષાકર્મીઓ ઉપલબ્ધ કરાવવામાં કોઈ મુશ્કેલી નહીં આવે
કેન્દ્રીય ગૃહમંત્રી અમિત શાહના પુત્ર અને બીસીસીઆઈના સચિવ જય શાહ આઈપીએલને ભારતમાં લાવવા માટે સખત મહેનત કરી રહ્યા છે. સૂત્રોના જણાવ્યા અનુસાર આ અંગે બીસીસીઆઈ અને કેટલાક સરકારી મંત્રાલયો વચ્ચે ચર્ચા પણ થઈ છે. ચૂંટણી દરમિયાન મેચો માટે સુરક્ષાકર્મીઓ ઉપલબ્ધ કરાવવામાં કોઈ મુશ્કેલી નહીં આવે. અગાઉ 2009 અને 2014માં સામાન્ય ચૂંટણીને કારણે આઈપીએલનું આયોજન વિદેશમાં કરવું પડ્યું હતું. 2009માં આઈપીએલના કમિશનર લલિત મોદી હતા અને ત્યારબાદ સમગ્ર ટુર્નામેન્ટ દક્ષિણ આફ્રિકામાં યોજાઈ હતી. જ્યારે 2014માં યુએઈના અબુધાબી, દુબઈ અને શારજાહમાં પ્રથમ 20 મેચોનું આયોજન કરવામાં આવ્યું હતું. 2 મેના રોજ ચૂંટણી બાદ બાકીની મેચો ભારતમાં યોજવામાં આવી હતી. પરંતુ 2019 માં સામાન્ય ચૂંટણીની સાથે IPLની તમામ મેચો દેશમાં યોજાઈ હતી.
ડબલ્યુપીએલનું આયોજન બે શહેરોમાં કરવામાં આવશે
WPLની બીજી સિઝન આ વખતે બે શહેરોમાં યોજાશે. આ વખતે WPL મેચ દિલ્હી અને બેંગલુરુમાં રમાશે. ગયા વર્ષે WPLની તમામ મેચો મુંબઈમાં રમાઈ હતી, જેમાં મુંબઈ ઈન્ડિયન્સની ટીમ વિજેતા બની હતી. WPLમાં પાંચ ટીમો રમે છે, જેમાં દિલ્હી કેપિટલ્સ, રોયલ ચેલેન્જર્સ બેંગ્લોર, ગુજરાત જાયન્ટ્સ અને યુપી વોરિયર્સનો સમાવેશ થાય છે.
