ઉનાળામાં જીમ કોરબેટ નેશનલ પાર્ક જવાના બે ફાયદા છે. આ સિઝનમાં અહીં સફારીમાં વાઘ પણ જોવા મળે અને હાથીઓના ઝુંડ પણ જોવા મળે. 
અને હા ક્યારેક હાથીના ચાર્જ કરવાનો (પાછળ પડવાનો) લાભ પણ મળે.
કોરબેટ નેશનલ પાર્કમાં ઉનાળામાં બીજરાની ઝોન હોય કે ઢિકાલા ઝોન હોય હાથીના નાના ગૃપ થી લઈ 50-60 હાથીનું ઝુંડ જોવા મળે. હાથીનું ઝુંડ સસ્તા પરથી પસાર થતું હોય ત્યારે જીપ્સીથી વચ્ચે થી ઉતાવળે પસાર નહીં થવાનું ખાસ ધ્યાન રાખવું પડે. નહીં તો ક્યારેક હાથી પાછળ પડીને ચાર્જ કરી દે.
હાથીઓના ઝુંડને નદી પસાર કરતા તથા નદીની રેતીને સુંઢ થી ભરીને શરીર પર અને હવામાં ઉડાવતા જોતા જોતા ફોટો-વિડિયોગ્રાફી કરવાની મજા કંઈક અનેરી જ છે.
ઘણીવાર તો આ ઝુંડમાં 8-10 નાના મદનિયા (હાથીના બચ્ચા) હોય, જે ખૂબ રમતીયાળ હોય અને સરસ ફોટો લેવાના અનેક મોકા પણ આપે. આમ ઉનાળામાં કોરબેટ નેશનલ પાર્કની મુલાકાતનો અનુભવ એકવાર ચોક્કસ લેવો જોઈએ.
