PM મોદીએ યોજ્યો રોડ શો, વડનગરવાસીઓમાં ભારે ઉત્સાહ

વડનગર– પીએમ નરેન્દ્ર મોદી આજે રવિવારે તેમના ગુજરાત પ્રવાસના બીજા દિવસે માદરે વતન વડનગરની મુલાકાતે આવ્યા હતા. વડનગરવાસીઓમાં અદકેરો ઉત્સાહ હતો. ગુંજા હેલીપેડ પર ઉતર્યા પછી પીએમ મોદીએ ખુલ્લી કારમાં વડનગર સુધી રોડ શો કર્યો હતો. અને વડનગરવાસીઓઓનું અભિવાદન ઝીલ્યું હતું. પોતાના ગામના એવા અને આપણા નરેન્દ્ર મોદીને આવકારવા વડનગરવાસીઓમાં ભારે થનગનાટ જોવા મળ્યો હતો. આખા વડનગરને દુલ્હનની જેમ શણગાર કરવામાં આવ્યો હતો અને વડનગરને રોશનીથી ઝળાહળા કરવામાં આવ્યું છે. પીએમ મોદી રોડ શો દ્વારા જ્યારે વડનગરમાં પ્રવેશ્યા ત્યારે ભારે આનંદનો માહોલ હતો, અને વડનગરવાસીઓ અને નરેન્દ્ર મોદી માટે આજની ભાવુક ક્ષણ હતી. બધાની આંખમાં ખુશીના ઝળઝળીયા આવી ગયા હતા.

વડનગરવાસીઓનો પ્રેમ જોઈને ખુદ મોદી પણ ભાવુક ચહેરે વડનગરમાં ફર્યા હતા. તેમણે વડનગરના હાટકેશ્વર મંદિરે દર્શન કર્યા હતા, અને હાટકેશ્વર મહાદેવની પૂજા કરી અને આરતી ઉતારી હતી.હાટકેશ્વર મહાદેવના દર્શન કરીને પીએમ મોદીએ જીએમઈઆરએસ મેડીકલ કોલેજનું લોકાર્પણ કર્યું હતું. તેમની સાથે સીએમ વિજય રૂપાણી, ડેપ્યુટી સીએમ નિતીન પટેલ અને પૂર્વ મુખ્યપ્રધાન આનંદીબહેન પટેલ ઉપસ્થિત રહ્યા હતા.