નવી દિલ્હી- કેન્દ્ર સરકાર દ્વારા અનેક યોજનાઓને આધાર કાર્ડ સાથે લિંક કરવાના વિરોધમાં ઘણી અરજીઓ દાખલ કરવામાં આવી છે. જેમાં પશ્ચિમ બંગાળની મમતા બેનરજી સરકારે પણ આધાર કાર્ડના વિરોધમાં એક અરજી કરી હતી. જેની સુનાવણીમાં સુપ્રીમ કોર્ટે મમતા બેનરજીની સરકારને ફટકાર લગાવી છે. અને પ્રશ્ન કર્યો છે કે, સંસદમાં પસાર થયેલા કાયદાની વિરુદ્ધમાં કોઈ રાજ્ય કેવી રીતે જઈ શકે?
આધાર કાર્ડ લિંક કરવા અંગે પશ્ચિમ બંગાળની મમતા સરકારની અરજી પર જસ્ટિસ એ.કે.સીકરી અને જસ્ટિસ અશોક ભૂષણની બેંચે સુનાવણી હાથ ધરી હતી. જેમાં કોર્ટે મમતા બેનરજી સરકારને ફટકાર લગાવી છે. સુપ્રીમ કોર્ટે પશ્ચિમ બંગાળ સરકારને ટકોર કરતા જણાવ્યું કે, સંસદ દ્વારા પસાર કરવામાં આવેલા કાયદાનું રાજ્ય સરકાર કેવી રીતે ઉલ્લંઘન કરી શકે?
વધુમાં સુપ્રીમે કોર્ટે કહ્યું કે, જો પશ્ચિમ બંગાળ સરકારને કેન્દ્ર સરકારના આધાર કાર્ડના નિર્ણયથી કોઈ નારાજગી હોય તો વ્યક્તિગત અરજી દાખલ કરી શકે છે. પરંતુ કોઈ રાજ્ય કાયદાની વિરુદ્ધમાં જઈ શકે નહીં. ઉલ્લેખનીય છે કે, કેન્દ્ર સરકાર દ્વારા વિવિધ યોજનાઓમાં આધાર કાર્ડને ફરજિયાત કરવા તેમજ મોબાઈલ નંબર અને બેંક એકાઉન્ટ સાથે આધાર કાર્ડ લિંક કરવાના કેન્દ્ર સરકારના નિર્ણયના વિરોધમાં સુપ્રીમ કોર્ટમાં અનેક અરજીઓ કરવામાં આવી છે.